शिपाई नसल्याने पालिका शाळांमध्ये विद्यार्थ्यांकडून सफाई; पालकांची तीव्र नाराजी
कल्याण-डोंबिवली महापालिकेच्या शिक्षण विभागाच्या अखत्यारितील ६० शाळांमध्ये शिपाई संवर्गातील कर्मचारी नसल्याने दैनंदिन स्वच्छतेची जबाबदारी शिक्षक आणि विद्यार्थ्यांवर पडली आहे. यामुळे पालकांमध्ये तीव्र नाराजी निर्माण झाली असून, त्यांनी पालिका प्रशासनाने तातडीने शिपाई व सफाई कामगारांची नियुक्ती करावी, अशी मागणी केली आहे.
Eduvarta
एज्युवार्ता न्यूज नेटवर्क
कल्याण-डोंबिवली महापालिकेच्या शिक्षण विभागाच्या अखत्यारितील ६० शाळांमध्ये शिपाई संवर्गातील कर्मचारी नसल्याने दैनंदिन स्वच्छतेची जबाबदारी शिक्षक आणि विद्यार्थ्यांवर पडली आहे. यामुळे पालकांमध्ये तीव्र नाराजी निर्माण झाली असून, त्यांनी पालिका प्रशासनाने तातडीने शिपाई व सफाई कामगारांची नियुक्ती करावी, अशी मागणी केली आहे. महापालिकेच्या शाळा चाळी, झोपडपट्टी तसेच शहराच्या मध्यवर्ती भागात पसरल्या आहेत. येथे इयत्ता पहिली ते सातवीपर्यंत मराठी, उर्दू, हिंदी आणि इंग्रजी माध्यमातून शिक्षण दिले जाते. बहुतांश विद्यार्थी घराजवळील या शाळांमध्ये शिकत असताना स्वच्छतेच्या अभावामुळे त्यांच्या शिक्षणावर विपरीत परिणाम होत आहे.
वर्गात कागदाचे तुकडे, खोडरबराचा कचरा आणि इतर केरकचरा साठतो. स्वतंत्र सफाई कर्मचारी नसल्याने शिक्षकांना विद्यार्थ्यांच्या मदतीने दररोज झाडलोट करावी लागते. शाळा सुरू होण्यापूर्वी वर्ग स्वच्छ असावेत, हे आवश्यक असतानाही ही व्यवस्था शिक्षक-विद्यार्थ्यांनाच सांभाळावी लागत आहे. अध्यापनासोबतच अतिरिक्त कामाचा बोजा शिक्षकांवर पडत असल्याने त्यांच्या मूळ कामात व्यत्यय येतो. शिवाय अनेक शाळांना सुरक्षित व कुलूपबंद प्रवेशद्वारे नसल्याने शाळा सुटल्यानंतर भटके श्वान, गायींचा वावर होतो. रात्री मद्यपी वर्‍हांड्यात मद्यपान करून कचरा टाकतात, त्यामुळे श्वानांची विष्ठा व जनावरांचे शेण साचते.
शिक्षण विभागाचे अधिकारी तपासणीसाठी आल्यावर त्यांच्या स्वागताची जबाबदारीही शिक्षकांवर येते. शिपायांकडून अपेक्षित कामे शिक्षकांना करावी लागत असल्याने त्यांच्यातही नाराजी आहे. घरात मुलांना झाडू मारू देत नाही, पण शाळेत त्यांना स्वच्छतेची कामे करावी लागतात, अशी तक्रार पालकांनी केली आहे. सुमारे दोन हजार कोटी रुपयांचा अर्थसंकल्प असलेल्या महापालिकेने स्वतःच्या शाळांमध्ये आवश्यक कर्मचारी नेमण्यासाठी पुढाकार घ्यावा, अशी अपेक्षा व्यक्त केली जात आहे.
खासगी शाळांमध्ये विद्यार्थ्यांच्या स्वच्छतेसाठी व शाळेच्या देखभालीसाठी कर्मचारी उपलब्ध असतात. त्याच धर्तीवर पालिका शाळांमध्येही कायमस्वरूपी व्यवस्था उभी राहावी, अशी पालकांची मागणी आहे. शिक्षकांवर अतिरिक्त जबाबदारी टाकणे आणि विद्यार्थ्यांकडून स्वच्छतेची कामे करून घेणे हे योग्य नाही, असे मत पालक व्यक्त करीत आहेत. प्रशासनाने या प्रश्नाकडे गांभीर्याने लक्ष देऊन कर्मचारी नियुक्तीची प्रक्रिया सुरू करावी, अशी आग्रही मागणी होत आहे.
या परिस्थितीमुळे शाळांचे शैक्षणिक वातावरण प्रभावित होत आहे. पालिका प्रशासनाने तात्काळ पावले उचलून शिपाई व सफाई कर्मचारी नेमल्यास शिक्षक अध्यापनावर लक्ष केंद्रित करू शकतील आणि विद्यार्थ्यांना स्वच्छ वातावरणात शिकण्याची संधी मिळेल. पालक व शिक्षकांची ही मागणी लक्षात घेऊन महापालिकेने आवश्यक ती व्यवस्था करावी, अशी अपेक्षा व्यक्त केली जात आहे.
