सेवानिवृत्त प्राध्यापकांवर विद्यापीठ मेहरबान का ? 

एज्युवार्ता न्यूज नेटवर्क 

SPPU NEWS: सावित्रीबाई फुले पुणे विद्यापीठाच्या(Savitribai Phule Pune University)विविध समित्यांवर विद्यापीठातर्फे सेवानिवृत्त प्राध्यापकांच्या नियुक्ती (Appointment of Retired Professors)केल्या जात असल्याची माहिती समोर आली आहे. विद्यापीठामार्फत विशेषतः CAS समिती व सहाय्यक प्राध्यापक निवड समितीवर सेवानिवृत्त प्राध्यापकांच्या नेमणुका होत आहेत. मात्र, यामुळे सध्या सेवेत असलेल्या प्राध्यापकांवर अन्याय होत आहे. त्यामुळे यापुढील काळात सेवानिवृत्त प्राध्यापकांच्या नेमणुका विविध समित्यांवर करू नये, अशी मागणी थेट विद्यापीठाच्या अर्थशास्त्र अभ्यास मंडळाने (Board of Economics Studies)विद्यापीठाकडे केली आहे.

सावित्रीबाई फुले पुणे विद्यापीठाच्या विविध समित्यांवर सेवानिवृत्त प्राध्यापकांच्या नियुक्ती केल्या जात असल्याच्या तक्रारी अर्थशास्त्र अभ्यास मंडळाकडे अनेक प्राध्यापकांकडून केल्या जात आहेत. विद्यापीठाच्या समित्यांवर सध्या सेवेत कार्यरत असलेल्या प्राध्यापकांच्या नियुक्त्या नाही केल्या, तर संबंधित प्राध्यापकांवर अन्याय होणार आहे.त्यामुळे विद्यापीठाचे कुलगुरू व प्र-कुलगुरू यांनी विविध समित्यांवर सेवेत कार्यरत असणाऱ्या प्राध्यापकांच्या नियुक्त्या कराव्यात, अशी मागणी अर्थशास्त्र अभ्यास मंडळातर्फे करण्यात आली होती, यास अर्थशास्त्र अभ्यास मंडळाचे अध्यक्ष सुनील उगले यांनी दुजोरा दिला आहे. तसेच त्यावर विद्यापीठ प्रशासनाकडून पुढील कार्यवाही केली जात असल्याचेही त्यांनी सांगितले आहे. 

विद्यापीठाच्या संकेतस्थळावर असणाऱ्या महाविद्यालयामधील प्राध्यापकांच्या प्रोफाइल अद्ययावत नाहीत. महाविद्यालयातून सेवानिवृत्त प्राध्यापकांच्या प्रोफाइल काढून टाकणे आवश्यक आहे. विद्यापीठाने प्राध्यापकांच्या प्रोफाइल अपडेट करण्यासंदर्भात महाविद्यालयांना सूचना दिल्या आहेत.त्यामुळे प्रोफाइल अपडेट झाल्यानंतर सेवानिवृत्त प्राध्यापकांची नावे विविध समित्यांवर जाणार नाहीत, असे बोलले जात आहे.