कोणत्या विघातक कृत्यांचा विद्यापीठ प्रशासनाने केला निषेध..

एज्युवार्ता न्यूज नेटवर्क 

सावित्रीबाई फुले पुणे विद्यापीठातील मुलींच्या वसतीगृहाच्या वसतीगृह प्रमुख या पदाच्या हस्तांतरणावरून विद्यापीठ वर्तुळात उलट सुलट चर्चा सुरू आहेत.काहींनी या घटनेला जातीय रंग दिला असल्याचे बोलले जात आहे.मात्र,समाजमाध्यमावर विद्यापीठातील अधिकारी यांच्या संबंधातील मंचकूर प्रसिध्द झाल्याने विद्यापीठाची बदनामी होत आहे. त्यामुळे या कृत्याचा विद्यापीठ प्रशासनाने प्रसिध्द पत्रक प्रसिद्ध करून तीव्र शब्दात निषेध केला आहे.

वसतीगृह प्रमुख पद काढून घेतल्यानंतर संबंधित महिला प्राध्यापक यांनी याबाबत विद्यापीठाचे कुलगुरू यांना पत्र लिहिले.तसेच विद्यापीठातील काही अधिकाऱ्यांनी दबाव आणणून वसतीगृह प्रमुख पदाचा राजीनामा घेतल्याचा आरोप केला. त्यावर काही विद्यार्थी संघटनांनी आवाज उठवला.त्यामुळे विद्यापीठाने याबाबत प्रसिध्दी पत्रक प्रसिद्ध केले आहे. 

 विद्यापीठ प्रशासनाने प्रसिध्द प्रसिद्ध केलेल्या परिपत्रकानुसार विद्यापीठ प्रशासनाच्या सोयीसाठी निर्माण करण्यात आलेली काही पदे ही सेवाज्येष्ठता अथवा विशिष्ट अर्हतेची पदे नाहीत. अशी पदे प्रशासकीय नियोजनासाठी आणि त्या त्या विभागाचे कामकाज सुरळीत होण्यासाठी असतात. अशा पदांवर नियमित अथवा अतिरिक्त कार्यभार हा पदोन्नतीचा भाग नसतो. या पदांची इतर संविधानिक पदांसारखी निश्चित कालमर्यादा निर्धारित नसून, अशा तात्पुरत्या नियुक्त्या केवळ प्रशासनाच्या अखत्यारीतील बाबी आहेत. त्यामुळे विद्यापीठातील एका पद हस्तांतरणाबाबत जी माहिती समाजमाध्यमांवर प्रसारित होत आहे, ती केवळ गैरसमजातून व हेतुपुरस्सर पसरवण्यात येत आहे. अशा एका पद हस्तांतरणासंबंधीचे पत्र विद्यापीठ प्रशासनास प्राप्त झाले आहे. त्याच्याशी संबंधित पद व हस्तांतरणाबाबत कोणत्याही प्रकारचा भेदभाव झालेला नाही. संबंधित व्यक्तीशी प्रशासनाने याबाबत वेळोवेळी संवाद साधण्याचाही प्रयत्न केला होता. संबंधित कार्यभार हस्तांतरित होत असताना काही अनुचित प्रकार घडला असल्यास याबाबत नियमानुसार चौकशी करण्यात येईल. विद्यापीठ प्रशासन आपल्या शिक्षक, कर्मचारी व अधिकाऱ्यांचा सन्मान राखण्याचा नेहमीच प्रयत्न करत असते.

विद्यापीठ प्रशासन हे महाराष्ट्र सार्वजनिक विद्यापीठ अधिनियम २०१६ व त्याअंतर्गत असलेले परिनियम, अध्यादेश, विनियम यांना अनुसरून विविध प्रशासकीय निर्णय घेत असते. सदर निर्णय हे प्रशासनाचा कारभार सुरळीत होण्यासाठी आणि विद्यापीठ व महाविद्यालयीन विद्यार्थी, प्राध्यापक तसेच कर्मचारी यांचे विविध प्रश्न सोडवण्यासाठी घेण्यात येत असतात. अशाच विद्यार्थी केंद्री निर्णयाच्या अनुषंगाने काही व्यक्ती वैयक्तिक बदनामीकारक मजकूर व खोटी माहिती विविध समाजमाध्यमांवर पसरवत असल्याचे निदर्शनास आले आहे. अशाप्रकारे जातीय तेढ व कलुषितता निर्माण करण्याचा प्रयत्न करणे आणि या प्रकारातून विद्यापीठातील अधिकाऱ्यांना वैयक्तिकरित्या लक्ष्य करणे. तसेच या सर्व मार्गांनी विद्यापीठाची बदनामी करणे, अशा विघातक कृत्यांचा विद्यापीठ प्रशासन तीव्र शब्दात जाहीर निषेध व्यक्त करत आहे, याची सर्व संबंधितांनी नोंद घ्यावी.

----------------------------------

विद्यापीठ प्रशासनाने जाहीर प्रकटन प्रसिद्ध करून हा संवेदनशील विषय जाणीवपूर्वक माध्यमांना प्रसिद्धीसाठी दिला आहे. पिडित व्यक्तीच्या बाजूने उभे राहणे गुन्हा आहे का ? आंबेडकरी चळवळीतील एक कार्यकर्ता म्हणून आम्ही नेहमीच अन्यायाच्या विरोधात भूमिका घेत असतो आणि यापुढे देखील घेत राहू. मला व माझ्या सहकार्यांच्यावर खोटे गुन्हे दाखल करण्याचे षडयंत्र रचले जात आहे. जर आमच्यावर खोटे गुन्हे दाखल झाले तर मला देखील त्या सर्व लोकांवर ॲट्रॉसिटी अंतर्गत गुन्हे दाखल करावे लागतील. 

- राहुल ससाणे ( अध्यक्ष - विद्यापीठ विद्यार्थी संघर्ष कृती समिती महाराष्ट्र राज्य )