UPSC'लॅटरल एंट्री' भरती प्रक्रिया अखेर रद्द
भरती प्रक्रियेला सर्व विरोधी पक्षांकडून विरोध होत होता. या पार्श्वभूमीवर भरती प्रक्रिया रद्द करण्यात आली आहे.
eduvarta@gmail.com 
एज्युवार्ता न्युज नेटवर्क
केंद्रीय लोकसेवा आयोगाने (UPSC) केंद्र सरकारच्या विविध विभागांमध्ये (Departments Of Govt) सहसचिव (Joint Secretary), संचालक (Director) आणि उपसचिव (Deputy Secretary) या पदांसाठीची भरती प्रक्रिया रद्द केली आहे.या भरतीची जाहिरात (Advertising) 17 ऑगस्ट रोजी देण्यात आली होती. मात्र, या भरती प्रक्रियेला सर्व विरोधी पक्षांकडून विरोध होत होता. या पार्श्वभूमीवर भरती प्रक्रिया रद्द करण्यात आली आहे.
आयोगाने upsc.gov.in या अधिकृत वेबसाइटवर या पदांसाठीच्या भरतीची जाहिरात प्रसिद्ध केली होती. तसेच upsconline.nic.in या ऍप्लिकेशन पोर्टलवर या पदांसाठी अर्ज प्रक्रिया सुरू केली होती. पण वरिष्ठ प्रशासकीय पदांवर विविध क्षेत्रातील तज्ज्ञांची थेट भरती करणे आणि अशा भरती प्रक्रियेत आरक्षित वर्गांना (एससी,एसटी,ओबीसी इ) कोणत्याही प्रकारचे आरक्षण न देणे यासारखे मुद्दे विरोधी पक्षांकडून उपस्थित केले गेले.
यानंतर केंद्रिय मंत्री जितेंद्र सिंह यांनी यूपीएससीच्या अध्यक्षांना पत्र लिहून ही भरती प्रक्रिया थांबवण्याची विनंती केली होती. या पार्श्वभूमीवर आता आयोगाने 'लॅटरल एंट्री' भरती प्रक्रिया रद्द करण्याची अधिसूचना जारी केली आहे. अधिसूचनेत,UPSC ने संबंधित विभागाने केलेल्या विनंतीनुसार भरती रद्द करण्याचे कारण दिले आहे.
