यंदा वह्यांच्या पानांशिवाय पहिलीची पाठ्यपुस्तके मिळणार

एज्युवार्ता न्यूज नेटवर्क

विद्यार्थ्यांच्या पाठीवरील दप्तराचे ओझे कमी होण्याच्या सकारात्मक हेतूने शासनाने दोन वर्षांपासून पाठ्यपुस्तकांमध्ये विभाजन करून धड्याचे व कवितेच्या पाठीमागे आवश्यकतेनुसार वहीचे पान जोडले होते. मात्र, ज्या उद्देशाने ही पाने पुस्तकांमध्ये जोडण्यात आली होती, तो उद्देश सफल न झाल्याचे शासनाच्या निदर्शन आले आहे. त्यामुळे 2025-2026 या वर्षापासून पूर्वीप्रमाणेच पाठ्यपुस्तके वहीच्या पानांशिवाय (Textbooks without notebook pages) उपलब्ध करून देण्याचा शासन निर्णय निर्गमित करण्यात आला होता. त्यामुळे इयत्ता पहिलीतील ११ लाखांपेक्षा अधिक विद्यार्थ्यांना नवीन अभ्यासक्रमाची पाठ्यपुस्तके (New curriculum textbooks) वह्यांच्या पानांशिवाय देण्यात येणार आहेत.

गेल्यावर्षी पाठ्यपुस्तकांसोबत वह्यांची पाने जोडून त्याचा संच दिला गेला होता. मात्र, यंदा तसे होणार नाही. यासंदर्भातील परिपत्रक पाठ्यपुस्तक मंडळाचे संचालक कृष्णकुमार पाटील यांनी प्रसिद्ध केले आहे. पाठ्यपुस्तकांना वह्यांची पाने जोडण्याचा निर्णय यंदा बदलल्यामुळे त्याचे शिक्षक, मुख्याध्यापकांनी स्वागत केले आहे.

राष्ट्रीय शैक्षणिक संशोधन प्रशिक्षण परिषदेचा (एनसीईआरटी) अभ्यासक्रम यंदापासून पहिलीला लागू होणार आहे. त्यासाठी नवीन अभ्यासक्रमाच्या पाठ्यपुस्तकांची छपाई वेगात सुरू आहे. शाळा सुरू होण्याच्या पहिल्या दिवशीच विद्यार्थ्यांना पाठ्यपुस्तके मिळणार आहेत. परंतु यंदा पुस्तकांसोबत वह्यांची पाने नसणार आहेत. तसेच १ ली ते ८ वी पाठ्यपुस्तके शाळा सुरू होण्यापूर्वी उपलब्ध करून दिली जाणार आहेत.

दरम्यान, पाठ्यपुस्तक मंडळाच्या नोंदणीकृत पुस्तक विक्रेत्यांना आणि शैक्षणिक संस्थांना पुस्तकांच्या खरेदीवर १५ टक्के सवलत देण्यात येते. ती देखील यंदा ५ टक्केच देण्यात येणार आहे.