विद्यापीठ सुरू करणार आपत्ती व्यवस्थापन विभाग
विद्यापीठाने सर्व महाविद्यालयांमध्ये आपत्ती व्यवस्थापन विभागाच्या माध्यमातून नवनवीन अभ्यासक्रम सुरू करावेत, अशी मागणी युवा सेनेच्या वतीने विद्यापीठाचे कुलगुरू डॉ.सुरेश गोसावी यांच्याकडे निवेदनाद्वारे करण्यात आली.
eduvarta@gmail.com 
एज्युवार्ता न्यूज नेटवर्क
केवळ ग्रामीण भागातच नाही तर शहरी भागातही आपत्ती व्यवस्थापनाची (Disaster Management)आवश्यकता वाढत चालली आहे. त्यामुळे या विषयावरील अभ्यासक्रम सर्व महाविद्यालयांमधील विद्यार्थ्यांना उपलब्ध करून देणे गरजेचे आहे, अशी मागणी सावित्रीबाई फुले पुणे विद्यापीठाच्या (Savitribai Phule Pune University) कुलगुरूंकडे युवासेना सहसचिव कल्पेश यादव (Kalpesh Yadav)यांनी शनिवारी केली. त्यावर कुलगुरू डॉ.सुरेश गोसावी (Vice Chancellor Dr. Suresh Gosavi) यांनी सकारात्मक प्रतिसाद देत विद्यापीठात स्वतंत्र आपत्ती व्यवस्थापन विभाग सुरू करण्याचे आश्वासन दिले. परिणामी लवकरच विद्यापीठाच्या माध्यमातून विद्यार्थ्यांना आपत्ती व्यवस्थापन विषयक अभ्यासक्रम उपलब्ध होणार आहेत.
नैसर्गिक व मानवनिर्मित घटनांमुळे अनेक नागरिकांना मोठ्या संकटांना सामोरे जावे लागते, अशावेळी आपत्ती व्यवस्थापनाची आवश्यकता भासते. त्यामुळे विद्यापीठाने सर्व महाविद्यालयांमध्ये आपत्ती व्यवस्थापन विभागाच्या माध्यमातून नवनवीन अभ्यासक्रम सुरू करावेत, अशी मागणी युवा सेनेच्या वतीने विद्यापीठाचे कुलगुरू डॉ.सुरेश गोसावी यांच्याकडे निवेदनाद्वारे करण्यात आली. युवासेनेचे सहसचिव कल्पेश यादव यांनी कुलगुरूंची भेट घेऊन शनिवारी याबाबतचे निवेदन दिले.
कल्पेश यादव म्हणाले, नवीन शैक्षणिक धोरणाच्या अंमलबजावणीच्या माध्यमातून नवनवीन कौशल्य अभ्यासक्रम सुरू केले जात आहेत. विद्यापीठाने आपत्ती व्यवस्थापन विषयक अभ्यासक्रम सुरू केल्यास तो विद्यार्थ्यांना उपयुक्त ठरेल. केवळ महाराष्ट्रातच नाही तर महाराष्ट्राबाहेरही आपत्ती व्यवस्थापन विषयक अनेक रोजगाराच्या संधी उपलब्ध आहेत. या रोजगाराच्या संधीचा वेध घेऊन विद्यापीठाने आपत्ती व्यवस्थापन विषयक अभ्यासक्रम सुरू करण्याची आवश्यकता आहे.
शहरी भागात पावसाचे पाणी शिरल्याने नागरिकांना मदत करणे, आगेच्या दुर्घटना घटने, पर्यटनाच्या ठिकाणी अडकलेल्या पर्यटकांना बाहेर काढणे, या आणि अशा अनेक घटनांमध्ये नागरिकांना मदतीची आवश्यकता असते. महाराष्ट्रात आपत्ती व्यवस्थापनाचा अभ्यासक्रम चालवणाऱ्या शैक्षणिक संस्थांची संख्या अत्यल्प आहे. त्यामुळे सावित्रीबाई फुले पुणे विद्यापीठाने अभ्यासक्रम सुरू करावा. अशी मागणी कुलगुरूंकडे करण्यात आली. कुलगुरूंनी ही मागणी मान्य करत लवकरच विद्यापीठात स्वतंत्र आपत्ती व्यवस्थापन विभाग सुरू करून विद्यार्थ्यांना त्या अनुषंगाने अभ्यासक्रम उपलब्ध करून दिला जाईल, असे आश्वासन दिले असल्याचे यादव यांनी सांगितले.
