आरटीई प्रतीक्षा यादीतील विद्यार्थ्यांची प्रवेश प्रक्रिया अखेर सुरू 

एज्यूवार्ता न्यूज नेटवर्क

राज्याच्या शालेय शिक्षण विभागातर्फे (school education department )शिक्षण हक्क कायद्याअंतर्गत (Right to education act ) 25 टक्के आरक्षित जागांसाठी ऑनलाईन प्रवेश प्रक्रिया राबवली जात असून नियमित विद्यार्थ्यांची प्रवेश प्रक्रिया पूर्ण झाल्यानंतर आता प्रतीक्षा यादीतील विद्यार्थ्यांची प्रवेश प्रक्रिया (RTE waiting list student admission process) सुरू करण्यात आली आहे. शिक्षण विभागातर्फे 16 ऑगस्ट ते 26 ऑगस्ट या कालावधीत ही प्रवेश प्रक्रिया पूर्ण केली जाणार आहे, राज्याचे प्राथमिक शिक्षण संचालक शरद गोसावी (Sharad gosavi director of primary education)यांनी परिपत्रकाद्वारे ही माहिती प्रसिद्ध केली आहे. 

आरटीई प्रवेशासाठी 2 लाख 42 हजार 516 विद्यार्थ्यांनी अर्ज केले होते.त्यातील 93 हजार 32 विद्यार्थ्यांची प्रवेशासाठी निवड करण्यात आली होती. राज्यातील 72 हजार 276 विद्यार्थी प्रतीक्षा यादीत असून प्रवेश प्रक्रियेच्या नियमित फेरीमधून 61 हजार 156 विद्यार्थ्यांना प्रवेश देण्यात आले आहेत. आता उर्वरित जागांवर प्रतीक्षा यादीतील विद्यार्थ्यांना प्रवेश दिला जाणार आहेत. 16 ऑगस्टपासून विद्यार्थ्यांना प्रवेशाचे एसएमएस जाण्यास सुरुवात होणार असून 16 ते 26 या कालावधीत प्रवेशाची लिंक खुली केली जाणार आहे.

आरटीई  प्रवेशासाठी पात्र ठरलेल्या विद्यार्थ्यांना प्रवेशासाठी दोन वेळा मुदतवाढ देण्यात आली होती. त्यानंतर प्रतीक्षा यादीतील विद्यार्थ्यांची प्रवेश प्रक्रिया केव्हा सुरू होणार? याबाबत पालकांकडून विचारणा केली जात होती. 14 ऑगस्ट रोजी शिक्षण विभागातर्फे प्रतीक्षा यादीतील विद्यार्थ्यांचे प्रवेश प्रक्रिया सुरू करण्याबाबत परिपत्रक प्रसिद्ध करण्यात आले आहे.तसेच नियोजित वेळेत संबंधितांनी प्रवेश प्रक्रिया पूर्ण करावी, असे आदेश शरद गोसावी यांनी दिले आहेत.