आयटीआयमध्ये 'या' नवीन अभ्यासक्रमाचा होणार समावेश
शासकीय औद्योगिक प्रशिक्षण संस्थेतून टेक्स्टाइल आधारित अभ्यासक्रम सुरू करावेत. याचा लाभ उद्योजकांना तर होईलच; परंतु स्थानिक स्तरावरच बेरोजगारांना रोजगार उपलब्ध होईल. कौशल्य विकास विभाग नावीन्यपूर्ण अभ्यासक्रम तयार करून विद्यार्थ्यांना प्रशिक्षित करण्यासाठी विविध योजना राबवत असल्याचेही त्यांनी यावेळी सांगितले.
eduvarta@gmail.com 
एज्युवार्ता न्यूज नेटवर्क
सोलापूरमध्ये टेक्सटाइल इंडस्ट्री (Textile industry in Solapur) मोठ्या प्रमाणात आहे त्यामुळेच शासकीय आयटीआयमध्ये देखील टेक्सटाइलवर आधारित प्रशिक्षणाचा अभ्यासक्रम (Textile-based training course) सुरू करण्यात यावा, अशा सूचना कौशल्य विकासमंत्री मंगलप्रभात लोढा (Skill Development Minister Mangalprabhat Lodha) यांनी दिल्या आहेत. सोलापूर शहरातील मंगळवेढेकर इन्स्टिट्यूट ऑफ मॅनेजमेंट (Mangalvedhekar Institute of Management) येथे आयोजित केलेल्या पंडित दीनदयाल उपाध्याय रोजगार मेळावा (Pandit Deendayal Upadhyay Employment Fair) कार्यक्रमात मंत्री लोढा मार्गदर्शन करत होते.
जिल्हा कौशल्य विकास, रोजगार व उद्योजकता मार्गदर्शन केंद्र आणि के. पी. मंगळवेढेकर इन्स्टिट्यूट ऑफ मॅनेजमेंट यांच्या संयुक्त विद्यमाने हा रोजगार मेळावा आयोजित करण्यात आला होता. यावेळी कौशल्य विकास उपायुक्त अनुपमा पवार, कौशल्य विकासासह आयुक्त संगीता खंदारे, भाजप शहराध्यक्षा रोहिणी तडवळकर, जिल्हाध्यक्ष शशिकांत चव्हाण, मंगळवेढेकर इन्स्टिट्यूटचे प्राचार्य राजेश पटवर्धन यांच्यासह अन्य मान्यवर उपस्थित होते.
यावेळी बोलताना मंत्री मंगलप्रभात लोढा म्हणाले की, सोलापूर हे कपडा उद्योगाचे मोठे केंद्र आहे, त्यामुळे येथे कपडा उद्योगात प्रशिक्षित मनुष्यबळाला खूप मोठी मागणी आहे.
नावीन्यपूर्ण अभ्यासक्रम
शासकीय औद्योगिक प्रशिक्षण संस्थेतून टेक्स्टाइल आधारित अभ्यासक्रम सुरू करावेत. याचा लाभ उद्योजकांना तर होईलच; परंतु स्थानिक स्तरावरच बेरोजगारांना रोजगार उपलब्ध होईल. कौशल्य विकास विभाग नावीन्यपूर्ण अभ्यासक्रम तयार करून विद्यार्थ्यांना प्रशिक्षित करण्यासाठी विविध योजना राबवत असल्याचेही त्यांनी यावेळी सांगितले.
या प्रकारचे मेळावे २००८ पासून नियमितपणे घेतले जात आहेत. आजतागायत लाखो विद्यार्थ्यांना रोजगार, स्वयंरोजगार तसेच उद्योग उपलब्ध करून देण्यात आले आहे. आजच्या रोजगार मेळाव्यात १७ खासगी कंपन्याचे प्रतिनिधींनी दोन हजार रिक्त पदांसाठी मुलाखती घेतल्या आहेत, अशी माहिती यावेळी कौशल्य विकास विभागाच्या उपायुक्त अनुपमा पवार यांनी दिली.
दरम्यान, सोलापूर रेडिमेड कापड उत्पादक संघाने गेल्या ८ वर्षात देशभरात विविध राज्यात यूनिफॉर्म गारमेंट उत्पादनाचे प्रदर्शन भरविले आहे. आता गारमेंट उद्योगाला कुशल कामगारांची गरज असून सोलापुरात एक स्टेट आर्ट ऑफ गारमेंट ट्रेनिंग सेंटरची उभारणी करावी, अशी मागणी सोलापुरातील गारमेंट उद्योजकांनी राज्याचे कौशल्य विकास आणि उद्योजकता मंत्री मंगल प्रभात लोढा यांच्याकडे केली. उद्योजकांनी तसे निवेदन मंत्री लोढा यांना दिले. यावर 'आयटीआय'मध्ये ट्रेनिंग सेंटर उभारले जाईल, असे आश्वासन त्यांनी दिले.
