दिरंगाई भोवली! विद्यापीठ नाटक राडा प्रकरणी पोलीस उपनिरीक्षकाचे निलंबन
अतिरिक्त पोलीस आयुक्त रंजनकुमार शर्मा यांनी पोलीस उपनिरीक्षकाला केले सेवेतून निलंबित
eduvarta@gmail.com 
एज्युवार्ता न्यूज नेटवर्क
सावित्रीबाई फुले विद्यापीठाच्या (Savitribai Phule Pune University) ललित कला केंद्राच्या (Lalit Arts Center) आवारात घडलेल्या राड्यावरुन आता अनेक घडामोडी समोर येत आहेत. या घटनेवेळी बंदोबस्तासाठी असलेले पोलीस उपनिरीक्षक सचिन गाडेकर (Sub-Inspector of Police Sachin Gadekar) यांनी वरिष्ठ अधिकाऱ्यांना सदर घटनेची त्वरीत माहिती न कळवल्याच्या कारणास्तव त्यांना तडकाफडकी निलंबित करण्यात आले आहे. घडलेल्या घटनेची गंभीर दखल घेत अतिरिक्त पोलीस आयुक्त रंजनकुमार शर्मा (Additional Commissioner of Police Ranjan Kumar Sharma) यांनी पोलीस उपनिरीक्षकाला सेवेतून निलंबित केले आहे.
गाडेकर यांनी या प्रकरणाची गंभीर दखल घेतली नाही. त्यांनी रॅपिड ॲक्शन फोर्सला बोलाविले नाही, वरिष्ठ पोलीस निरीक्षक, सहायक आयुक्त, उपायुक्त यांच्यासह नियंत्रण कक्षाला या घटनेची माहिती त्वरीत कळवली नाही. पोलीस अधिकारी म्हणून कार्यरत असताना कर्तव्यात कसुरी केली. अशा प्रकारच्या बेजबाबदारपणामुळे पोलीस दलाची प्रतिमा जनमानसात मलीन झाल्याचा ठपका त्यांच्यावर ठेवून त्यांच्यावर ही कारवाई करण्यात आली आहे.
विद्यापीठात ललित कला केंद्रातील विद्यार्थ्यांनी रामायणावर आधारित नाटक सादर केले होते. नाटकात श्रीराम आणि सीता मातेचे पात्र साकारलेल्या विद्यार्थांकडून अश्लील वक्तव्य करण्यात आले, असा आरोप करत अखिल भारतीय विद्यार्थी परिषदेच्या कार्यकर्त्यांनी हा कार्यक्रम बंद पाडला. त्यामुळे आवारात मोठा राडा निर्माण झाला होता.
हा वाद एवढ्यावरच न थांबता दुसऱ्या दिवशी अखिल भारतीय विद्यार्थी परिषद आणि भारतीय जनता पक्ष युवा मोर्चाच्या कार्यकत्यांनी ललित कला केंद्राच्या आवरात घोषणाबाजी करून शाईफेक करणे, खिडकीच्या काचा फोडणे, कुंडया फोडून सरकारी मालमत्तेचे नुकसान करण्यात आले. यावेळी ललित कला केंद्रात चतुःश्रंृगी पोलीस ठाण्यात कार्यरत असलेले पोलीस उपनिरीक्षक सचिन गाडेकर बंदोबस्तास होते. यावेळी कायदा आणि सुव्यवस्थेचा प्रश्न निर्माण झालेला असताना गाडेकर यांनी त्याची माहिती वरिष्ठांना देण्यात दिरंगाई केली. त्यामुळे त्यांच्यावर निलंबनाच्या कारवाईचा बडगा उगारण्यात आला आहे.
