SRTMUN चा सावळा गोंधळ, हाॅल तिकिट शिवाय विद्यार्थी देणार परीक्षा!
परीक्षा विभागाने कोणतीही तसदी न घेता ज्या विद्यार्थ्यांना प्रवेशपत्र मिळाले नाहीत त्यांची यादी महाविद्यालयांना दिली गेला आहे. त्याआधारे विद्यार्थ्यांना महाविद्यालयाच्या ओळखपत्रावर परीक्षेला बसू द्यावे, असे सांगण्यात आले आहे.
eduvarta@gmail.com 
एज्युवार्ता न्यूज नेटवर्क
स्वामी रामानंद तीर्थ मराठवाडा नांदेड विद्यापीठाच्या (Swami Ramanand Tirtha Marathwada Nanded University) सत्र परीक्षा आज १० डिसेंबरपासून सुरू झाल्या आहेत. मात्र, विद्यापीठाकडून काही विद्यार्थ्यांना अद्याप प्रवेशपत्र देण्यात आले नाहीत. त्यामुळे विद्यापीठाचा सावळा गोंधळ समोर आला आहे. ज्यांच्याकडे परीक्षेचे हाॅल तिकिट (Exam hall ticket) नाहीत अशा विद्यार्थ्यांना महाविद्यालय ओळखपत्राच्या आधारे परीक्षा कक्षेत प्रवेश दिला जाणार असल्याची माहिती विद्यापीठाच्या परीक्षा व मूल्यमापन मंडळाने प्रसिद्धीपत्रकाद्वारे दिली आहे.
परीक्षा काही तासांवर आली असताना प्रवेशपत्र मिळाले नसल्याने विद्यार्थी परीक्षा कशी देणार? असा सवाल उपस्थित केला जात होता. अशावेळी परीक्षा विभागाने कोणतीही तसदी न घेता ज्या विद्यार्थ्यांना प्रवेशपत्र मिळाले नाहीत त्यांची यादी महाविद्यालयांना दिली गेला आहे. त्याआधारे विद्यार्थ्यांना महाविद्यालयाच्या ओळखपत्रावर परीक्षेला बसता येणार असल्याची माहिती परीक्षा विभागाने दिली आहे.
ऐन परीक्षेच्या दिवशी परीक्षा केंद्रावर विद्यार्थ्यांना प्रवेशपत्र देण्याचा असा अजब फंडा विद्यापीठाकडून यापूर्वी अवलंबिला होता. यामुळे परीक्षा केंद्र, परीक्षा क्रमांक आदींची माहिती कशी मिळणार आणि कोणी विद्यार्थी परीक्षेपासून वंचित राहिल्यास जबाबदार कोण? असा सवाल देखील या निमित्ताने उपस्थित करण्यात आला होता. त्यानंतर विद्यापीठाने ही युक्ती काढली आहे.
स्वामी रामानंद तीर्थ मराठवाडा विद्यापीठाचे कार्यक्षेत्र नांदेडसह हिंगोली, परभणी आणि लातूर या चार जिल्ह्यात आहे. हजारो विद्यार्थ्यांचे भवितव्य घडविणाऱ्या विद्यापीठाचा परीक्षा विभाग मात्र नेहमीच कोणत्या न कोणत्या कारणाने चर्चेत असतो. आता पदवी व पदव्युत्तर अभ्यासक्रमांच्या परीक्षांना सुरुवात झाल्या आहेत. यामध्ये बी.ए., एम.ए., बी.कॉम., एम.कॉम., बी.एसस्सी., एम.एसस्सी आदींच्या परीक्षा तसेच बहिस्थः विभाग आणि बॅकलॉग आणि रेग्युलर विषयाच्या परीक्षांचा समावेश आहे.
