दहावी-बारावीची परीक्षा देताना 'या' शाळेतील विद्यार्थ्यांना येणार अडचण

एज्युवार्ता न्यूज नेटवर्क

महाराष्ट्र राज्य माध्यमिक व उच्च माध्यमिक शिक्षण मंडळातर्फे (Maharashtra State Board of Secondary and Higher Secondary Education) फेब्रुवारी मार्च 2025 मध्ये घेतल्या जाणाऱ्या इयत्ता दहावी बारावीच्या परीक्षांचे वेळापत्रक (Class 10th, 12th exams to be held in February-March 2025) जाहीर करण्यात आले आहे. मात्र, राज्य मंडळाच्या संकेतस्थळावर परीक्षा अर्ज (Exam application) भरताना शाळा किंवा कॉलेजच्या प्रोफाईलमध्ये शाळेची व संस्थेची माहिती, मान्यता प्राप्त विषय तसेच इयत्ता दहावी, बारावीच्या वर्गास शिकवणाऱ्या सर्व शिक्षकांची माहिती भरणे बंधनकारक (It is mandatory to fill in the information of all teachers) केले आहे. सर्व आवश्यक माहिती येत्या 30 नोव्हेंबरपर्यंत अद्ययावत करून मंडळाकडे सादर न केल्यास संबंधित शाळेतील विद्यार्थ्यांची प्रिलिस्ट, विद्यार्थी यादी व फी चलन मंडळाकडून स्वीकारले जाणार नाही, असे परिपत्रक राज्य मंडळाचे सचिव औदुंबर उकिरडे यांनी प्रसिद्ध केले आहे. परिणामी शाळांची माहिती अद्ययावत न झाल्यास संबंधित शाळेतील विद्यार्थ्यांना परीक्षेबाबत अडचणी निर्माण होण्याची शक्यता आहे.

राज्य मंडळातर्फे सर्व शाळांचे व कनिष्ठ महाविद्यालयांचे प्रोफाइल अद्ययावत करून घेतले जात आहे. याबाबत शिक्षण मंडळाने वेळोवेळी शाळा व कनिष्ठ महाविद्यालयांना सूचना दिल्या आहेत. आता शाळा व शिक्षकांचे प्रोफाइल अद्ययावत करण्यासाठी 30 नोव्हेंबरपर्यंत अंतिम मुदत देण्यात आलेली आहे. ज्या शाळा दिलेल्या मुदतीमध्ये माहिती अद्ययावत करणार नाहीत, त्या शाळांची परीक्षेची प्रिलिस्ट, विद्यार्थी यादी व फी चलन मंडळाकडून स्वीकारले जाणार नाही, याची गांभीर्याने नोंद घेऊन आवश्यक कार्यवाही करावी. तसेच शिक्षक पॅनल अद्ययावत करण्यासाठी मंडळाकडून आपल्या शाळा कनिष्ठ महाविद्यालयांना शिक्षक पॅनलची प्रत यापूर्वी पाठवण्यात आली होती. ज्या शाळा किंवा कनिष्ठ महाविद्यालयाने पॅनल अद्यावत करून अद्याप मंडळाकडे जमा केलेले नाही. त्यांनी संबंधित पॅनल व प्रिलिस्ट साहित्य जमा करतेवेळी मंडळ प्रतिनिधीकडे सादर करावे.

इयत्ता दहावी व बारावी मार्च 2025 जुलै ऑगस्ट 2025 परीक्षा संबंधित उत्तरपत्रिका तपासणी व परीक्षेत संबंधित इतर कामकाजासाठी आपल्या शाळा व कनिष्ठ महाविद्यालयातील हजेरीपटावरील प्रत्येक विषय शिक्षकांची नावे ऑनलाईन प्रोफाइल मध्ये भरण्याची जबाबदारी संबंधित मुख्याध्यापक व प्राचार्य तसेच संस्थेच्या सचिवांची आहे. तात्पुरत्या स्वरूपात ज्या विषय शिक्षकांची नियुक्ती केली जाते. त्यांची नावे शिक्षक पॅनलमध्ये शाळा केव्हा कनिष्ठ महाविद्यालयाकडून मंडळास कळवली जातात. परंतु, अभ्यासक्रम पूर्ण होताच त्यांना संस्थेतून कमी केले जाते, असे मंडळाच्या निदर्शनास आले आहे. तात्पुरत्या स्वरूपात नेमणूक केलेल्या शिक्षकांना परीक्षेच्या निकाला संबंधित कामे पूर्ण होण्याच्या कालावधीपर्यंत ठेवण्याची जबाबदारी प्राचार्यांची व मुख्याध्यापकांची राहील.

शिक्षकांच्या हजेरी पटावर विषय शिक्षकांची नावे आहेत आणि प्रोफाइलमध्ये भरले नाहीत, असे मंडळाच्या तपासणी पथकाच्या निदर्शनास आल्यास तसेच नियमित किंवा तात्पुरत्या स्वरूपात नियुक्ती केलेल्या विषय शिक्षकास मंडळाकडून उत्तरपत्रिका तपासणीचे काम किंवा परीक्षा संबंधित इतर कामाचे आदेश प्राप्त होताच त्याच्याकडून काम करून घेण्यास टाळाटाळ केली जाते. त्यामुळे परीक्षेच्या कामकाजात अडथळा निर्माण केला व कामात कसूर केल्याचा ठपका ठेवून संबंधित मुख्याध्यापक व प्राचार्य यांच्यावर नियमाप्रमाणे कारवाई केली जाईल, असेही परिपत्रकामध्ये नमूद करण्यात आले आहे.