राजगडच्या झेडपी शाळेतील शुभ्राची गरुडझेप;नासा भेटीसाठी निवड  

एज्युवार्ता न्यूज नेटवर्क 

शालेय जीवनातच अमेरिकेतील नासा (NASA in America)या जगप्रसिद्ध अंतराळ संशोधन संस्थेला भेट देण्याची संधी पुण्यातील काही विद्यार्थ्यांना मिळाली असून त्यात राजगड तालुक्यातील पाबे शाळेतील (Pabe schools in Rajgad taluka) विद्यार्थीनी शुभ्रा नवनाथ रेणुसे (Shubhra Navnath Renuse)हिचा समावेश आहे.अत्यंत दुर्गम, डोंगरी व प्रतिकूल भौगोलिक परिस्थिती आणि बालवयातच वडिलांच्या निधनामुळे डोक्यावरचे मायेचे छत्र हरवले, अशा अत्यंत बिकट आर्थिक परिस्थितीत शिक्षण घेत पुढे जाण्याची जिद्द ठेवणारी अशी शुभ्रा रेणुसे हिने नासाकडे झेप घेतली असून राजगड तालुक्यातून निवड झालेली ती एकमेव विद्यार्थिनी आहे.

 नासा संस्थेला भेट देण्यासाठी पुणे जिल्ह्यातील 16 हजार 121 विद्यार्थ्यांपैकी 25 विद्यार्थ्यांची तीन टप्प्यात अत्यंत पारदर्शी पद्धतीने परीक्षा घेऊन निवड करण्यात आली आहे. त्यामध्ये पाबे (ता.राजगड) येथील जिल्हा परिषदेच्या शाळेत सातवीच्या वर्गात शिक्षण घेणारी कु. शुभ्रा नवनाथ रेणुसे या एकमेव विद्यार्थिनीची समावेश आहे.आंतरविद्यापीठ खगोलशास्त्र व खगोलभौतिकशास्त्र केंद्र (आयुका) व पुणे जिल्हा परिषद यांच्या वतीने घेण्यात आलेल्या पूर्व परीक्षा, मुख्य परीक्षा व मुलाखत अशा तीन पातळ्या पार करीत शुभ्रा रेणुसे हिने हे घवघवीत यश मिळविले आहे. या तिच्या यशाबद्दल संपूर्ण राजगड तालुक्यातून कौतुकाचा वर्षाव होत आहे.

 शुभ्रा रेणुसे हिच्या संघर्षाची कहाणी हृदय पिळवटून टाकणारी आहे. 2023 च्या मार्च महिन्यातील 6 तारीख उजाडली. तेव्हा शुभ्रा इयत्ता चौथीच्या वर्गात शिकत होती. तिची वार्षिक परीक्षा जवळ आली होती. आपल्या लाडक्या लेकीवर जीवापाड प्रेम करणारे वडील नवनाथ रेणुसे हे बाजारपेठ असलेल्या वेल्हे या तालुक्याच्या ठिकाणी गेले होते. दुपारी दोनच्या सुमारास तिच्या वडिलांवर प्राणघातक हल्ला झाला आणि त्या हल्ल्यात ते मृत्युमुखी पडले. या घटनेने संपूर्ण तालुक्यावर शोककळा पसरली आणि शुभ्राच्या घरावर काळाने घातलेल्या घाल्याने तिच्यावर मोठे आभाळ कोसळले. मोठी बहीण जान्हवी आणि शुभ्रा या दोन्ही पोरक्या झाल्या. आईच्या कष्टाच्या छायेत वाढलेली आणि वडिलांच्या सावलीविना मोठ्या झालेल्या शुभ्राने मेहनत, आत्मविश्वास, जिद्द, चिकाटी, निरंतर अभ्यास आणि शिक्षणातील उत्कटतेमुळे अकल्पनीय उंचीवर गरुडभरारी घेतली आहे.

शुभ्रा रेणुसे म्हणाली, "उन्हाळी सुट्टीत परगावी गेल्याने अभ्यासात व्यत्यय येऊ नये म्हणून यंदाच्या सुट्टीत आम्ही बाहेरगावी न जाण्याचा निर्णय घेऊन शाळेतील मुख्याध्यापक व वर्गशिक्षक सुरेश कोळी , शिक्षिका कविता साळुंके व मंगेश औटी या शिक्षकांच्या ऑनलाईन तासाला रात्री 8 ते 10 तर कधी कधी 11 देखील वाजायचे,अशा वेळी तासाला हजर राहून नोट्स काढणे, दर बुधवारी व शनिवारी गुगल फॉर्मच्या माध्यमातून शाळेने सुरु केलेल्या ऑनलाईन टेस्ट सोडविणे, चालू घडामोडींसाठी शिक्षकांच्या मार्गदर्शनाखाली बातम्या पाहणे, गुगलवर माहिती सर्च करणे, आठवी, नववी आणि दहावीच्या पाठ्यपुस्तकांचा बारकाईने अभ्यास करणे व त्यावर आधारित ऑनलाईन टेस्ट पुन्हा पुन्हा सोडविणे, चुकलेल्या उत्तरांचा योग्य पर्याय समजून घेणे आणि पुन्हा सराव करणे या पद्धतीने अभ्यास केला. त्याचबरोबर मुलाखतीसाठी निवड झालेल्या सर्व विद्यार्थ्यांची गटशिक्षणाधिकारी संग्राम पाटील यांनी अभिरूप मुलाखतीचे आयोजन करून सर्व विद्यार्थ्यांना अनमोल मार्गदर्शन केले त्यामुळे आत्मविश्वास द्विगुणित झाला.  मला नासामध्ये झालेल्या संशोधनाची माहिती घ्यायची आहे.तसेच पुढे जाऊन आयपीएस अधिकारी व्हायचे आहे.