NEP: शालेय शिक्षण अभ्यासक्रम मसुदा 2025 प्रसिध्द; आजपासून नोंदवा सूचना, अभिप्राय

एज्युवार्ता न्यूज नेटवर्क 

राष्ट्रीय शैक्षणिक धोरणानुसार इयत्ता तिसरी ते दहावीसाठी राज्य शैक्षणिक संशोधन व प्रशिक्षण परिषदेमार्फत (State Council of Educational Research and Training) शालेय शिक्षण अभ्यासक्रम (प्रस्तावित) मसुदा 2025 (School Education Curriculum Draft 2025) तयार करण्यात आला आहे. या मसुद्यावर सर्वसामान्य जनतेकडून सूचना व अभिप्राय मागविण्यात आले आहेत. 28 जुलै ते 27 ऑगस्ट 2025 या कालावधीपर्यंत सर्व शिक्षण तज्ञ, शिक्षक, अभ्यासक, पालक, अधिकारी, संघटना व समस्त समाज घटकांना याबाबत अभिप्राय नोंदवता येणार आहेत.

शालेय शिक्षण अभ्यासक्रम मसुदा राज्य शैक्षणिक संशोधन व प्रशिक्षण परिषदेच्या https://www.maa.ac.in/  संकेतस्थळावर सर्वांना पाहण्यासाठी उपलब्ध करून दिला आहे. या मसुद्यावरील अभिप्राय व सूचना सप्रमाण व सकारण असायला हव्यात. ज्यामध्ये विषय इयत्ता, स्तर, संबंधित पृष्ठ क्रमांक, मूळ मसुद्यातील मजकूर, अपेक्षित बदल, दुरुस्ती बदलाचे कारण, सुधारित मजकूर कसा असावा, याचा समावेश त्यात करणे अपेक्षित आहे. तसेच त्यामध्ये सूचना व अभिप्राय देणाऱ्या व्यक्तीचे नाव, दूरध्वनी क्रमांक ,ई-मेल, पत्ता इत्यादी तपशील देण्यात यावा.

अभिप्राय पोस्टाने पाठवायचा आहे. त्यांनी 'शालेय शिक्षण अभ्यासक्रम प्रस्तावित मसुदा 2025 बाबत' अभिप्राय असा उल्लेख त्यावर करणे गरजेचे आहे.त्याचप्रमाणे शासन निर्णय 30 जून 2025 नुसार डॉ. नरेंद्र जाधव यांच्या अध्यक्षतेखाली त्रिभाषा धोरण अंमलबजावणी बाबत समिती नियुक्त करण्यात आली आहे. या समितीच्या शिफारसी व त्यावरील होणाऱ्या शासनाच्या निर्णयास अनुसरून तिसऱ्या भाषेबाबत निर्णय लागू करण्यात येईल. तोपर्यंत विद्यमान पद्धती चालू राहील, असे राज्य शैक्षणिक संशोधन व प्रशिक्षण परिषदेचे संचालक राहुल रेखावार यांनी प्रसिद्धी पत्रकाद्वारे स्पष्ट केले आहे.  

शालेय शिक्षण अभ्यासक्रम मसुदा व अभिप्राय नोंदवण्यासाठी क्यू आर कोड देण्यात आला असून   https://www.maa.ac.in/ आणि  https://forms.gle/2rgGA37iYKfJUYKS6 या लिंकही उपलब्ध आहेत.