चार दिवसांच्या बाळाला घेऊन सावित्रीची लेक देतेय बारावीची परीक्षा, विद्यार्थिनीच्या जिद्दीचे राज्यभर कौतूक
नांदेड शहरातील श्री बसवेश्वर महाविद्यालयात शिक्षण घेणाऱ्या शीतल चित्ते या विद्यार्थिनीने प्रसूतीनंतर अवघ्या चार दिवसांत बारावीच्या बोर्ड परीक्षेला हजेरी लावून अनेकांसमोर आदर्श निर्माण केला आहे. प्रसूती झालेल्या अवस्थेतही शीतलने बारावीची परीक्षा देण्याचा ठाम निर्णय घेतला.
eduvarta@gmail.com 
एज्युवार्ता न्यूज नेटवर्क
बाळाला जन्म दिल्यानंतर बाळंतीन महिलेने किमान सात दिवस तरी घराबाहेर पडू नये, असे बोलल्या जाते. परंतु शिक्षण घेण्याची तळमळ, शिक्षणाची प्रबळ जिद्द (Strong commitment to education) आणि परिस्थितीवर मात करण्याची ताकद असेल तर कोणतेही स्वप्न अपूर्ण राहत नाही, याचे प्रेरणादायी उदाहरण नांदेडमध्ये पाहायला मिळत आहे. चार दिवसांच्या बाळाला (Four-day-old baby) सोबत घेऊन एक सावित्रीची लेक बारावी बोर्डाची परीक्षा (Class 12th board exam) देत असल्याचे समोर आले आहे. तिच्या या इच्छाशक्तीचे राज्यभरातून कौतूक (Appreciation from across the state) होत आहे.
नांदेड शहरातील श्री बसवेश्वर महाविद्यालयात शिक्षण घेणाऱ्या शीतल चित्ते या विद्यार्थिनीने प्रसूतीनंतर अवघ्या चार दिवसांत बारावीच्या बोर्ड परीक्षेला हजेरी लावून अनेकांसमोर आदर्श निर्माण केला आहे. प्रसूती झालेल्या अवस्थेतही शीतलने बारावीची परीक्षा देण्याचा ठाम निर्णय घेतला. अवघ्या चार दिवसांच्या बाळाला सोबत घेऊन ती परीक्षा केंद्रावर दाखल झाल्या आणि शांतपणे प्रश्नपत्रिका सोडवली. परीक्षा केंद्रावर उपस्थित शिक्षक व कर्मचाऱ्यांनीही त्यांच्या जिद्दीचे कौतुक केले. पती, कुटुंबीयांनीही त्यांना भक्कम साथ दिली.
प्रसूतीनंतर शारीरिक त्रास असतानाही शिक्षणाला प्राधान्य देत त्यांनी दाखवलेली चिकाटी अनेकांसाठी प्रेरणादायी ठरत आहे. शीतल यांचे शिक्षण पूर्ण करून शिक्षक होण्याचे स्वप्न आहे. परिस्थिती कशीही असली तरी शिक्षण पूर्ण करायचेच, असा निर्धार तिने व्यक्त केला. त्यांच्या या धाडसाचे सर्वत्र कौतुक होत असून, शिक्षणासाठीची त्यांची तळमळ समाजातील इतर विद्यार्थ्यांसाठी प्रेरणादायी ठरत आहे.
