संतोष देशमुखांच्या लेकीला बारावीत घवघवीत यश, संपूर्ण महाराष्ट्राचं जिंंकलं मन

एज्युवार्ता न्यूज नेटवर्क 

मस्साजोगचे सरपंच संतोष देशमुख (Sarpanch Santosh Deshmukh) यांची कन्या वैभवी देशमुख हिने यंदा बारावीची परीक्षा दिली. ती बारावी उत्तीर्ण झाली असून तिला ८५.११ टक्के मिळाले (Vaibhavi Deshmukh got 85.33 percent) आहेत. महाराष्ट्र राज्य माध्यमिक आणि उच्च माध्यमिक शिक्षण मंडळाचा (Maharashtra State Board of Secondary and Higher Secondary Education) इयत्ता १२ वी परीक्षेचा निकाल आज सोमवार ५ मे २०२५ रोजी दुपारी १ वाजता जाहीर करण्यात आला. या निकालात वैभवी देशमुखने महाराष्ट्राचे मन जिंकले. वडीलांच्या दुर्दैवी मृत्यूचे आभाळाएवढे दु:ख पचवत वैभवीने बारावीत घवघवीत यश संपादन केले आहे. 

संतोष देशमुख यांच्या हत्याप्रकरणाने महाराष्ट्राचे राजकीय तसेच सामाजिक वातावरण ढवळून निघाले होते. या भयंकर हत्याकांडाने संपूर्ण महाराष्ट्र सुन्न झाला होता. एकीकडे संतोष देशमुख यांच्या हत्येने कुटुंबीय हादरले असतानाच त्यांची कन्या वैभवी देशमुख बारावीची परीक्षा देत होती. त्यामुळे तिच्या निकालाकडे सर्वांचे लक्ष लागले होते. बारावीच्या परीक्षेत वैभवी देशमुखने ८५.३३ टक्के इतके मार्क्स मिळवलेत. या निकालानंतर तिचे सर्वत्र कौतुक होत आहे. 

आपल्या डोक्यावरील पितृछत्र हरवल्यानंतर वडिलांना न्याय मिळावा यासाठी आपले चुलते धनंजय देशमुख यांच्यासोबत वैभवी महाराष्ट्रभर फिरत होती. नेत्यांच्या गाठीभाठी घेत त्यांना आपल्याला न्याय देण्याची विनंती करत होती. डिसेंबरमध्ये तिच्या वडिलांच्या हत्या झाली तेव्हापासून ती न्याय मागत होती. आंदोलन करत होती. या काळात तिचा नीट परीक्षेचा अभ्यासही झाला नाही.

मात्र, बारावी  बोर्ड परीक्षेत वैभवी देशमुखला ८५.३३ टक्के गुण मिळाले आहेत. यात इंग्रजी विषयात ६३, मराठीत ८३, गणितामध्ये ९४, फिजिक्समध्ये ८३, केमेस्ट्रीत ९१ आणि बायोलॉजी विषयात ९८ गुण मिळाले आहेत. तिला एकूण ६०० पैकी ५१२ गुण मिळाले आहेत.  या निकालानंतर तिने आपल्या वडिलांच्या प्रतिमेचे दर्शन घेतले. 
____________________________________

मस्साजोगचे सरपंच स्व. संतोष देशमुख यांची लढवय्यी लेक वैभवी देशमुख हिने इयत्ता बारावीच्या परीक्षेत देदीप्यमान यश संपादन केले. अतिशय प्रतिकूल परिस्थितीत तिने मिळविलेले यश सर्वांसाठी प्रेरणादायी आहे. तिचे या यशाबद्दल हार्दिक अभिनंदन तथा पुढील वाटचालीसाठी खुप खुप शुभेच्छा.

- सुप्रिया सुळे, खासदार बारामती