MPSC कडून राज्य कर निरीक्षक संवर्गाची सुधारित तात्पुरती निवड यादी प्रसिद्ध 

एज्युवार्ता न्यूज नेटवर्क 

एमपीएससीकडून (MPSC)  महाराष्ट्र अराजपत्रित, गट-ब सेवा मुख्य परीक्षा २०२३ (Group-B Services Main Exam 2023) राज्य कर निरीक्षक (State Tax Inspector) संवर्गाचा सुधारित निकाल व सहायक कक्ष अधिकारी (Assistant Room Officer) या संवर्गाची सुधारित तात्पुरती निवड यादी प्रसिद्ध (Revised provisional selection list released)करण्यात आली आहे. तसेच यासाठी संमती पर्याय मागवण्यात आले आहे. त्यामुळे उमेदवारांनी कुठली खबरदारी घ्यावी याबाबत सविस्तर माहिती महाराष्ट्र लोकसेवा आयोगाकडून देण्यात आली आहे. यामध्ये उमेदवारांना त्यांचा पर्याय बदलण्याची संधी देखील उपलब्ध करून देण्यात आली आहे. 

यापुर्वी १८ जून रोजी तीन संवर्गाची शिफारस यादी / तात्पुरती निवड यादीमधील उमेदवारांसाठी संमती विकल्प मागविण्याची प्रक्रिया राबविण्यात आली होती. संमती विकल्पाच्या आधारे राज्य कर निरीक्षक संवर्गाचा सुधारित निकाल व सहायक कक्ष अधिकारी संवर्गाची सुधारित तात्पुरती निवड यादी सोबत जाहीर करण्यात आली आहे. निकालामध्ये काही उमेदवारांची एकापेक्षा जास्त संवर्गासाठी निवड होत असल्याचे निदर्शनास आले आहे. त्यामुळे अशा उमेदवारांकडून ते कोणत्या संवर्गाकरिता प्रथम पसंती देत आहेत. याबाबत त्यांची पुन्हा संमती विकल्प मागविण्यात येत आहेत. या अनुषंगाने त्यांच्या प्रोफाइलमध्ये संमती विकल्प उपलब्ध करून देण्यात आलेला आहे. त्यानुसार उमेदवाराचा विचार फक्त संमती विकल्प दिलेल्या संवर्गासाठी करण्यात येणार आहे, असे परिपत्रकात म्हटले आहे. 

उमेदवारास संवर्गाचा विकल्प बदलण्यासाठी ‘स्विकारले’ हा पर्याय निवडावा लागेल. उर्वरित संवर्गासाठी उमेदवारास ‘गीव्ह ॲप १’ हा पर्याय निवडावा लागेल. ज्या संवर्गासाठी ‘गीव्ह ॲप १’ पर्याय निवडला आहे, त्या संवर्गाकरिता त्यांच्या उमेदवारीचा विचार न करता इतर उमेदवारांचा गुणवत्तेवर विचार करण्यात येईल. संमतीविकल्प सादर करण्याकरीता आयोगाच्या https://mpsc.gov.in या संकेतस्थळावरील ‘ऑनलाईन फॅकल्टीज’ या मेनूमध्ये ‘कन्सेन्ट सबमिशन’ वेबलिंक उपलब्ध करून देण्यात आले आहे. 

महाराष्ट्र प्रशासकीय न्यायाधिकरण यांच्या आदेशानुसार संमती विकल्प मागविण्यात येत असल्याने सदर संमती विकल्प ऑनलाईन पद्धतीने आयोगास सादर करणे अनिवार्य आहे. आयोगाकडून निश्चित करण्यात आलेल्या उपरोक्त कालावधीत विहीत ऑनलाईन पद्धतीने संमती विकल्प सादर न केल्यास संबंधित उमेदवाराचा अंतिम निवडीकरिता विचार करण्यात येणार नाही. संमती विकल्प सादर करण्यास कोणत्याही प्रकारची तांत्रिक अडचण उद्भवल्यास आयोगाच्या मदत केंद्रावर संपर्क साधता येणार आहे, अशा  महत्त्वाच्या सुचना आयोगाकडून देण्यात आल्या आहेत.