नगर रचना आणि मूल्यनिर्धारण विभागात ‘या’ पदासाठी होतीय भरती; वाचा सविस्तर...
या भरती प्रक्रियेमध्ये ऑनलाईन अर्ज सादर करण्याचा कालावधी 19 जून 2025 ते 20 जुलै 2025 पर्यंत असणार आहे.
eduvarta@gmail.com 
एज्युवार्ता न्यूज नेटवर्क
महाराष्ट्र शासनाच्या नगररचना आणि मूल्यनिर्धारण विभागाअंतर्गत (Town Planning and Valuation Department, Government of Maharashtra) भरती प्रक्रिया (Recruitment) राबवली जात आहे. पुणे, कोकण, नागपूर, नाशिक, छत्रपती संभाजीनगर, अमरावती (Pune, Konkan, Nagpur, Nashik, Chhatrapati Sambhajinagar, Amravati) या विभागातील कनिष्ठ आरेखक गट 'क' या संवर्गातील रिक्त पदांवरील नियुक्तीसाठी (Appointment to vacant posts in Junior Draftsman Group 'C' cadre) पात्र उमेदवारांकडून केवळ ऑनलाइन पद्धतीने अर्ज (online applications) मागविण्यात येत आहेत. ऑनलाइन पद्धतीने अर्ज भरण्याची सुविधा महाराष्ट्र शासनाच्या https://dtp.maharashtra.gov.in/ या वेबसाईटवर दि. 19 जून 2025 पासून उपलब्ध करून देण्यात येणार आहे.
या भरती प्रक्रियेमध्ये ऑनलाईन अर्ज सादर करण्याचा कालावधी 19 जून 2025 ते 20 जुलै 2025 पर्यंत असणार आहे. तर ऑनलाइन पद्धतीने विहित परीक्षा शुल्क भरण्याचा अंतिम दिनांक 21 जुलै 2025 असणार आहे. याशिवाय हॉलतिकीट ऑनलाईन प्रिंट काढून घेणे व ऑनलाईन परीक्षेचा दिनांक याबाबतच्या सर्व सूचना विभागाच्या https://dtp.maharashtra.gov.in/ या अधिकृत संकेतस्थळावर प्रसिद्ध करण्यात येणार आहे.
दरम्यान, या पदासाठी अर्ज करणाऱ्या उमेदवाराचे किमान वय 18 वर्षे पूर्ण असावे व 38 वर्षापेक्षा जास्त नसावे. तसेच मागासवर्गीयांसाठी, खेळाडूंसाठी, आर्थिकदृष्ट्या दुर्बल घटकांसाठी, सामाजिक आणि शैक्षणिक दृष्ट्या मागासवर्गासाठी उमेदवारांच्या बाबतीत वयोमर्यादा पाच वर्षे शिथिलक्षम राहील. तसेच दिव्यांग, भूकंपग्रस्त व प्रकल्पग्रस्त उमेदवारांसाठी उच्चतम वयोमर्यादा 45 वर्षापर्यंत शिथिलक्षम राहील. पदवीधर अंशकालीन उमेदवारांसाठी उच्चतम वयोमर्यादा 55 वर्षांपर्यंत शिथिलक्षम राहील.
या भरती परीक्षेसाठी अराखीव (खुला) प्रवर्गासाठी एक हजार रुपये परीक्षा शुल्क तर राखीव प्रवर्गासाठी 900 रुपये शुल्क असणार आहे. याबरोबरच माझी सैनिकांसाठी या परीक्षेला बसलेल्या उमेदवारांना कोणतेही परीक्षा शुल्क आकारले जाणार नाही.
