रत्नदीप फार्मसी कॉलेजची संलग्नता रद्द; सर्व विद्यार्थ्यांचे समायोजन 

एज्युवार्ता न्यूज नेटवर्क 

गेल्या काही महिन्यांपासून वादात सापडलेल्या अहिल्यानगर जिल्ह्यातील जामखेड तालुक्यातील रत्नापूर येथील रत्नदीप मेडिकल फाउंडेशन रिसर्च सेंटर संचालित रत्नदीप कॉलेज ऑफ फार्मसी (Ratnadeep Pharmacy College)या महाविद्यालयाची संलग्नता (College affiliation)सावित्रीबाई फुले पुणे विद्यापीठाने (Savitribai Phule Pune University)अखेर रद्द केली आहे. त्यामुळे या महाविद्यालयातील विद्यार्थ्यांचे समायोजन इतर महाविद्यालयांमध्ये करण्याची प्रक्रिया सुरू झाली आहे. या विद्यार्थ्यांचे समायोजन करताना संबंधित विद्यार्थ्यांकडून स्थानांतर प्रमाणपत्र (ट्रान्सफर सर्टिफिकेट)व इतर शैक्षणिक दस्तऐवज अनिवार्य न करता विद्यार्थ्यांचे समायोजन करून घ्यावे, असे परिपत्रक विद्यापीठाच्या संलग्नता कक्षाचे उपकुलसचिव गिरीश बेत यांनी प्रसिद्ध केले आहे.

रत्नदीप कॉलेजच्या विद्यार्थ्यांना दिलेल्या वागणुकीमुळे आणि विद्यार्थ्यांनी पोलिसांकडे केलेल्या तक्रारीमुळे संबंधित महाविद्यालयाची वरिष्ठ पातळीवर चौकशी करण्यात आली. त्यात संबंधित महाविद्यालय प्रशासनाला दोषी ठरविण्यात आले. त्यानंतर या महाविद्यालयाची संलग्निकरण रद्द करण्याचा प्रस्ताव विद्यापीठाच्या विद्या परिषदेमध्ये सादर करण्यात आला. त्यास विद्या परिषदेने मान्यता दिली. त्यामुळे या महाविद्यालयातील विद्यार्थ्यांचे इतर महाविद्यालयामध्ये समायोजन करण्याची प्रक्रिया सुरू झाली आहे. 

रत्नदीप कॉलेज ऑफ फार्मसी हे विद्यार्थ्यांना स्थानांतर प्रमाणपत्र (ट्रान्सफर सर्टिफिकेट) देत नसल्याबाबत विद्यापीठात तक्रारी प्राप्त झाल्या आहेत. त्यामुळे अशा विद्यार्थ्यांचे शैक्षणिक हित लक्षात घेता ट्रान्सफर सर्टिफिकेट व इतर शैक्षणिक दस्तऐवज अनिवार्य न करता न्यायालयाच्या निर्णयाच्या अधिन राहून सदर विद्यार्थ्यांचे समायोजन करून घेण्यात यावे, असे निर्देश महाविद्यालयांना देण्यात आले आहेत.