बीड शिक्षक आत्महत्येचे पडसाद अधिवेशनात, संस्थाचालकांच्या चौकशीचे आदेश

एज्युवार्ता न्यूज नेटवर्क 

बीड जिल्ह्यात शिक्षकाने आत्महत्या (Beed teacher suicide case) केल्याची धक्कादायक घटना नुकतीच समोर आली . या शिक्षकाने फेसबुकवर लिहिलेल्या सुसाईट नोटवरून (Facebook susite note) शाळेच्या संस्थाचालक यांच्या जाचाला कंटाळून आत्महत्या केल्याचे समोर आले आहे. आता या प्रकरणाचे पडसाद अधिवेशनात उमटताना दिसत आहेत. विरोधी पक्षनेते अंबादास दानवे (Ambadas Danve) यांनी आत्महत्या प्रकरणावर कडक कारवाईची मागणी केली. त्यानंतर संस्थाचालकांची सखोल चौकशी करून दोषींवर कारवाई करू, अशी घोषणा शालेय शिक्षण राज्यमंत्री डॉ. पंकज भोयर (Dr. Pankaj Bhoyar) यांनी विधान परिषदेत केली.

विरोधी पक्षनेते अंबादास दानवे यांनी याप्रकरणी स्थगन प्रस्ताव मांडला होता. स्वराजनगर येथील शिक्षक धनंजय नागरगोजे यांना विक्रम मुंडे, विजय मुंडे, अतुल मुंडे या संस्थाचालकांनी पगार न देता फाशी घे आणि मोकळा हो, असे म्हणत आत्महत्या करायला भाग पाडले. आत्महत्येपूर्वी त्यांनी तीन वर्षांच्या लहान मुलीसाठी भावनिक पोस्ट लिहिली होती. त्यांनी आत्महत्या केल्यानंतर पोलिसांनी संस्थाचालकांवर गुन्हा का ? दाखल केला गेला नाही, असा सवाल दानवे यांनी केला.

बीड जिल्ह्यातील केज तालुक्यातील आश्रमशाळेमधील शिक्षक धनंजय नागरगोजे यांनी गळफास घेऊन आत्महत्या केली. त्यांच्या आत्महत्येप्रकरणी ते ज्या शाळेत शिक्षक होते त्या संस्थाचालकांची सखोल चौकशी करून दोषींवर कारवाई करू, अशी घोषणा राज्यमंत्री डॉ. पंकज भोयर यांनी सोमवारी विधान परिषदेत केली. भोयर यांनी उत्तर देताना आश्रमशाळा चालवणाऱ्या संस्थाचालकांकडून शिक्षकांचे वेतन थकविणाऱ्या शाळांचे सर्वेक्षण करून आढावा घेतला जाईल. याबाबत निर्णय घेऊन कारवाईचे आश्वासन त्यांनी दिले.