मुंबईसह कोकणात पावसाचा कहर! शाळा, काॅलेजला सुट्टी जाहीर.. 

एज्युवार्ता न्यूज नेटवर्क

मुंबईत काल रात्रीपासून सतत सुरू असलेल्या पावसामुळे शहराला (Mumbai rain news) नदीचे स्वरूप प्राप्त झाले आहे. रस्ते आणि रेल्वे मार्गावर अनेक ठिकाणी पाणी साचल्याने तेथील वाहतूक व्यवस्था पूर्णपणे ठप्प (Traffic system stopped) झाली आहे. मुंबईसह कोकणात पावसाचा कहर पाहायला मिळत आहे. त्यामुळे विद्यार्थ्यांची गैरसोय टाळण्यासाठी मुंबई महापालिका क्षेत्रातील सर्व शाळा, काॅलेजला सुट्टी जाहीर (Holiday announced for schools, colleges) करण्यात आली आहे. 

दादर, सायन, माटुंगा या भागात रस्त्यावर पाणी साचल्याने वाहतूक सेवा विस्कळित झाली आहे. हवामान विभागाने आज दिवसभर पावसाची शक्यता वर्तवली आहे. त्यामुळे भविष्यातील धोका लक्षात घेता स्थानिक प्रशासनाने सावध भूमिका घेतली आहे. शहरातील असंख्य विद्यार्थी प्रवास करून शाळेत ये-जा करत असतात, त्यांचा वाहतुकीतील अडथळा आणि पावसाचा अंदाज लक्षात घेता मुंबई महापालिकेने आज दिवसभराची सु्ट्टी जाहीर केली आहे. 

मुंबईसह कोकणालाही पावसाने चांगलेच झोडपले आहे. रायगडसह जिल्ह्यातील अनेक भागात ढगफुटी सदृष्य परिस्थिती निर्माण झाली आहे. त्यापार्श्वभूमीवर रायगड जिल्हा प्रशासनाने रायगड, अलिबाग व मुरुड तालुक्यातील शाळा, महाविद्यालयांना सुट्टी जाहीर केली आहे. रायगड जिल्ह्यात पावसाचा रेड अलर्ट जाहीर करण्यात आला आहे. 

मुसळधार पावसामुळे सिंधुदुर्ग आणि रत्नागिरी जिल्ह्यात पुरस्थिती निर्माण झाली आहे. अनेक गावांचा संपर्क तुटला आहे. यापार्श्वभूमीवर सिंधुदुर्ग, रत्नागिरी जिल्ह्यातील  शाळांना सुट्टी जाहीर करण्यात आली आहे. शाळांना सुट्टी जाहीर करण्याबाबतचे परिपत्रक तातडीने प्रसिद्ध करण्याचे आदेश शिक्षणमंत्री आणि पालकमंत्री  दीपक केसरकर यांनी सिंधुदुर्ग आणि रत्नागिरी जिल्हाधिकाऱ्यांना दिले आहेत.