विद्यार्थिनीला डुप्लिकेट मार्कशीट देण्यास विद्यापीठाने 5 वर्षे का लावले; आधिसभेत विचारला जाब

एज्युवार्ता न्यूज नेटवर्क 

सावित्रीबाई फुले पुणे विद्यापीठाच्या (Savitribai Phule Pune University)परीक्षा विभागाने (Examination Department)एका विद्यार्थिनीला डुप्लिकेट मार्कशीट(Duplicate mark sheet)एक, दोन, तीन वर्षे नाही तर तब्बल पाच वर्षे दिले नसल्याची धक्कादायक माहिती समोर आले आहे. त्यावर शनिवारी झालेल्या आधिसभेच्या बैठकीत जोरदार चर्चा झाली. तसेच याबाबत दोषी असणाऱ्यांवर कारवाई करण्याची मागणी करण्यात आली. तसेच संबंधित विद्यार्थिनीला 15 डिसेंबरपर्यंत डुप्लिकेट मार्कशीट देण्याचे आश्वासन विद्यापीठाचे कुलगुरू डॉ.सुरेश गोसावी (Vice Chancellor Dr. Suresh Gosavi)यांनी दिले.

सावित्रीबाई फुले पुणे विद्यापीठाचे आधिसभा सदस्य गणपत नांगरे यांनी एका विद्यार्थिनीला गुणपत्रिका देण्यास तब्बल पाच वर्षांचा कालावधी विद्यापीठ प्रशासनाने का लावला?  याबद्दल जाब विचारला. वैशाली मारुती गायकवाड ही विद्यार्थिनी पालिका कार्यालयात कार्यरत असून तिला पदोन्नतीसाठी संबंधित गुणपत्रिका सादर करावयाची होती. त्यासाठी तिने विद्यापीठाकडे गुणपत्रिका मिळण्याबाबत अर्ज केला होता. तब्बल पाच वर्ष ही विद्यार्थिनी गुणपत्रिका मिळवण्यासाठी विद्यापीठाच्या चकरा मारत होती. परंतु,  विद्यापीठाच्या परीक्षा विभागात वैशाली गायकवाड या विद्यार्थिनींच्या गुणपत्रिकाची नोंद लेझरवर करण्यात आली नव्हती. त्यामुळे या विद्यार्थिनीला गुणपत्रिका दिली जात नव्हती. अखेर विद्यापीठाच्या आधिसभेत याबाबत प्रश्न उपस्थित करण्यात आला.

विद्यापीठाच्या परीक्षा विभागातील कर्मचाऱ्यांच्या चुकीचा फटका या विद्यार्थिनीला बसला आहे. तिची पदोन्नती रखडली आहे. पाच वर्षांनंतर तरी तिला गुणपत्रिका दिली जाणार आहे का ? असा सवाल यावेळी उपस्थित करण्यात आला. त्यावर आधिसभा सदस्य सचिन गोरडे पाटील, कृष्णा भंडलकर, हर्ष गायकवाड यांच्यासह इतरही आधिसभा सदस्यांनी विद्यापीठ प्रशासनाविरोधात तीव्र भावना व्यक्त केल्या. त्यावर विद्यापीठ प्रशासनाने आपली चूक मान्य करत संबंधित विद्यार्थिनीला येत्या पंधरा दिवसात गुणपत्रिका दिली जाईल, असे सांगितले.