आयुर्वेदाची नाळ जोडणारा उपक्रम; “आयुर्वेद फॉर किड्स” पुस्तकाचे प्रकाशन
“आयुर्वेद फॉर किड्स” (मुलांसाठी आयुर्वेद) या पुस्तकाचे प्रकाशन होणार आहे. या पुस्तकाचे वैशिठ्य म्हणजे हे पुस्तक मिराया पटवर्धन आणि चित्रा गोडबोले या दोन लहान मुलींनी आपल्या आजोबांबरोबर म्हणजेच विद्यापीठ अनुदान आयोगाचे माजी उपाध्यक्ष प्रा. डॉ. भूषण पटवर्धन यांच्याबरोबर लिहिले आहे.
eduvarta@gmail.com 
एज्युवार्ता न्यूज नेटवर्क
राष्ट्रीय आयुर्वेद दिन हा २३ सप्टेंबर रोजी सर्वत्र साजरा होतो. या वर्षीची “लोकांसाठी आणि ग्रहांसाठी आयुर्वेद” ही संकल्पना असून आयुर्वेदाला त्याच्या उगमस्थानापासून ते जागतिक स्तरापर्यंत प्रोत्साहन देण्यासाठी सर्वत्र विविध उपक्रम योजले गेले आहेत. या दिनाच्या निमित्ताने मंगळवारी २३ सप्टेंबर २०२५ रोजी दुपारी चार वाजता आरोग्यशास्त्र विभाग, तसेच आर.सी.एफ.सी., पश्चिम विभाग, सावित्रीबाई पुणे विद्यापीठ आणि कन्नड संघाच्या कावेरी शैक्षणिक समूहाच्या संयुक्त विद्यमाने एक आगळा वेगळा कार्यक्रम डॉ. शामराव कलमाडी माध्यमिक शाळेत आयोजित केला आहे. या कार्यक्रमाच्या निमित्ताने “आयुर्वेद फॉर किड्स” (मुलांसाठी आयुर्वेद) या पुस्तकाचे प्रकाशन होणार आहे. या पुस्तकाचे वैशिठ्य म्हणजे हे पुस्तक मिराया पटवर्धन आणि चित्रा गोडबोले या दोन लहान मुलींनी आपल्या आजोबांबरोबर म्हणजेच विद्यापीठ अनुदान आयोगाचे माजी उपाध्यक्ष प्रा. डॉ. भूषण पटवर्धन (Dr. Bhushan Patwardhan)यांच्याबरोबर लिहिले आहे.
कार्यक्रमात शाळेतील विद्यार्थ्यांचे प्रकृति परीक्षण करून त्यांची आयुर्वेदाशी तोंड ओळख करून दिली जाईल. हा कार्यक्रम सर्वांसाठी खुला आहे. नव्या पिढीला प्रेरित करण्याच्या उद्देशातून एक छोटे प्रदर्शन येथे आयोजित करण्यात आले आहे. त्यात त्यांना आयुर्वेदाचे तज्ञ आणि संशोधक यांच्याबरोबर हलक्या फुलक्या संवादातून आयुर्वेदाची तसेच त्यात वापर होणाऱ्या काही वनस्पतींची ओळख, तसेच काही मजेशीर प्रयोग, विद्यार्थ्यांना रोजच्या जीवनात योगाचे महत्व तसेच शरीराचे घड्याळ, आरोग्यदायी आणि रुचकर सोप्या पाककृती, हर्बल चहा बनवणे अशा अनेक गोष्टींचा समावेश आहे.
लहान मुलांना आयुर्वेदाचे महत्व कळले तर ते आचरणात आणतील आणि पुढे जाऊन नव्या येणाऱ्या पिढीला पण त्याचे योग्य वेळी बाळकडू मिळेल या उद्देशाने या पुस्तकाची अतिशय योग्य वेळी निर्मिती झाली आहे. या कार्यक्रमास पुणे विद्यापीठाचे कुलगुरू प्रा. सुरेश गोसावी, माजी कुलगुरू प्रा. नितीन करमळकर, विक्रम साराभाई स्पेस सेंटर चे माजी अध्य्यक्ष पद्मश्री प्रमोद काळे, फोर्स मोटर्स आणि अमर प्रेरणा ट्रस्टचे मुख्य डॉ. अभय फिरोदिया, शिक्षण प्रसारक मंडळीचे अध्यक्ष श्री. एस. के. जैन, भारतीय संस्कृती दर्शन ट्रस्ट चे अध्यक्ष वैद्य एस. पी. सरदेशमुख, महाराष्ट्र आरोग्यशास्त्र विद्यापीठाच्या कुलगुरू डॉ. माधुरी कानिटकर, राष्ट्रीय शिक्षण मंडळाचे सचिव वैद्य राजेंद्र हुपरीकर, शिक्षण विवेक च्या संपादक प्रा. अर्चना कुडतरकर, पुणे विद्यापीठाचे प्र – कुलगुरु प्रा. पराग काळकर, आर.सी.एफ.सी., पश्चिम विभाग(पुणे विद्यापीठ) चे मुख्य संशोधक डॉ. डी. एन. मोकाट आणि कावेरी शैक्षणिक समूहाच्या सचिव मा. मालती कलमाडी अशी दिग्गज मंडळी उपस्थित असणार आहेत.
