पूजा खेडकरला बांधून ठेवले; आई- वडिलांना दिले गुंगीचे औषध; खेडकर कुटूबिय पून्हा चर्चेत

एज्युवार्ता न्यूज नेटवर्क 

खोट्या प्रमाणपत्रामुळे आयएएस बडतर्फीची कारवाई झालेल्या पूजा खेडकर पुन्हा एकदा वेगळ्या कारणामुळे चर्चेत आली आहे. विविध कारणांमुळे नेहमीच वादाच्या भोवऱ्यात सापडलेल्या पूजा खेडकरच्या पुण्यातील घरात चोरी झाल्याचा धक्कादायक प्रकार समोर आला आहे. घरातील नोकराने पूजाला बांधून ठेवून व तिच्या आई-वडिलांना गुंगीचे औषध देऊन घरातील ऐवजावर डल्ला मारला आहे. बाणेर परिसरातील खेडकर कुटुंबीयांबाबत हा प्रकार घडला असून याप्रकरणी पोलिसांकडे फोनवरून तक्रार देण्यात आली आहे. 

पुण्यातील बाणेर रस्त्यावर गेल्या काही वर्षांपासून खेडकर कुटुंबीय राहत आहे. खेडकर कुटुंबीयांसह काही कामगार सुध्दा येथे राहतात. त्यातील एक कामगार नेपाळ येथून आठ दिवसांपूर्वी येथे कामास आला होता. पूजा खेडकरने पोलीसांना दिलेल्या माहितीनुसार, नेपाळहून आलेला कामगारच या चोरीमागे असू शकतो, असा संशय व्यक्त करण्यात आला आहे. या कामगाराने शनिवारी रात्री दिलीप खेडकर आणि मनोरमा खेडकर यांना गुंगीचे औषध देऊन बेशुद्ध केले. त्यानंतर पूजा खेडकर हिला बांधून ठेवले. संबंधित संशयित कामगार हा घरातील सर्वांचे मोबाईल घेऊन पळून गेला आहे.

घडलेल्या घटनेनंतर पूजा खेडकर हिने स्वतःची सुटका करून घेतली. त्यानंतर तिने चतु:शृंगी पोलिसांशी संपर्क साधून घडलेल्या घटनेची माहिती दिली. त्यानंतर पोलीस पूजा खेडकर यांच्या घरी पोहोचले. त्यावेळी दिलीप खेडकर आणि मनोरमा खेडकर हे दोघेही बेशुद्ध अवस्थेत असल्याचे आढळून आले. पोलिसांनी त्यांना खाजगी रुग्णालयात उपचारासाठी दाखल केले असून दोघांचे प्रकृती स्थिर आहे.

दरम्यान, पूजा खेडकर यांनी अद्याप पोलिसांकडे लेखी तक्रार दिलेली नाही. मनस्थिती स्थिर झाल्यानंतर तक्रार देणार असल्याचे पूजा खेडकर यांनी पोलिसांना सांगितले आहे. तसेच मोबाईल व्यतिरिक्त इतर कोणत्या वस्तू चोरीला गेल्या आहेत, याची माहिती अद्याप समोर आलेली नाही. मात्र, पोलीस पुढील तपास करत आहेत.