पोलीस भरतीला ब्रेक! EWS प्रक्रियेमुळे भरतीला तात्पुरती स्थगिती

एज्युवार्ता न्यूज नेटवर्क 

पोलीस भरती प्रक्रियेसाठी (Police Recruitment Process) आर्थिक दुर्बल घटकातून अर्ज केलेल्या मराठा उमेदवारांच्या (Economically weaker sections Maratha candidates) निवड प्रक्रियेला तात्पुरता ब्रेक (A temporary break in the selection process) लागला आहे. तसेच उर्वरित उमेदवारांची निवड प्रक्रिया सुरू ठेवण्याचे आदेश अप्पर पोलीस महासंचालकांनी (Upper Director General of Police orders) संबंधित विभागांना दिले आहेत. अप्पर पोलीस महासंचालकांच्या या निर्णयामुळे शहर आणि ग्रामीण पोलीस भरतीसाठी आर्थिक दुर्बल घटकातून अर्ज केलेल्या मराठा उमेदवारांच्या निवडीला तात्पुरती स्थगिती देण्यात आली आहे.                                              

महाराष्ट्र पोलीस दलात गेल्या दोन महिन्यांपासून रिक्त पोलीस शिपाई पदासाठी भरती प्रक्रिया सुरू आहे. पोलीस भरतीसाठी मराठा समाजाच्या उमेदवारांनी EWS प्रवर्गातून अर्ज केल्याने निर्माण झालेला पेच अद्यापही कायम आहे. मराठा उमेदवारांच्या नियुक्ती बाबत धोरण निश्चितीसाठी अप्पर महासंचालकांनी शासनाला विनंती केली आहे. अशातच शासन निर्णय येईपर्यंत EWS प्रवर्गातून अर्ज करणाऱ्या उमेदवारांची उमेदवारी रद्द करण्याऐवजी तात्पुरती स्थगित देण्याचा निर्णय घेण्यात आला आहे. याआधी अप्पर महासंचालक कार्यालयाकडून EWS प्रवर्गातील उमेदवारांना SEBC अथवा खुल्या प्रवर्गाची निवड करण्यास सांगण्यात आले आहे. 

अप्पर महासंचालकांच्या नव्या आदेशाने मराठा समाजातील EWS प्रवर्गातून अर्ज करणाऱ्या उमेदवारांची भरती रद्द न होता, तात्पुरती स्थगित करण्यात आल्याने काहीसा दिलासा मिळाला आहे. अशातच आता शासन निर्णय काय होतो? आणि आर्थिक दुर्बल घटकातून अर्ज केलेल्या मराठा उमेदवारांच्या पोलीस भरतीबाबत प्रशासन नेमकी काय भूमिका घेते? हे पाहणे महत्त्वाचे ठरणार आहे.