फार्मसी प्रवेश प्रक्रियेचा मार्ग मोकळा; १ डिसेंबरनंतर प्रवेश फेऱ्या सुरू

एज्युवार्ता न्यूज नेटवर्क 

राज्यात १५ ऑक्टोबरपासून विधानसभा निवडणुकीची आचारसंहिता (Assembly Election Code of Conduct) लागू झाल्याने फार्मसी अभ्यासक्रमाची प्रवेश प्रक्रिया (Pharmacy course admission process) रखडली होती. मात्र, आता निवडणुका पार पडल्याने ही प्रवेश प्रक्रिया येत्या १ डिसेंबरनंतर कधीही सुरू होऊ शकते. त्यामुळे फार्मसी प्रवेशांच्या प्रतीक्षेत असलेल्या विद्यार्थ्यांना दिलासा मिळाला आहे. तसेच फार्मसी महाविद्यालय डिसेंबरच्या मध्यापासून म्हणजे १५ डिसेंबरनंतर कधीही सुरू होण्याची शक्यता वर्तवण्यात येत आहे. 

सर्वोच्च न्यायालयाने फार्मसी महाविद्यालयाची मान्यता प्रक्रिया यंदा ३१ ऑक्टोबरपर्यंत राबविण्याचे निर्देश फार्मसी कौन्सिल ऑफ इंडियाला दिले होते. तसेच या महाविद्यालयांना मान्यता प्रक्रियेवर हरकती अथवा सूचना देण्याची मुदत ३० नोव्हेंबरपर्यंत दिली होती. त्यानुसार यंदा पीसीआयने ३० नोव्हेंबरपर्यंत प्रवेश प्रक्रिया राबविण्याचे निर्देश विविध राज्यांच्या प्रवेश प्रक्रिया राबविणाऱ्या प्राधिकरणांना दिले होते.

राज्यात विधानसभा निवडणुकीची आचारसंहिता १५ ऑक्टोबरपासून लागू झाली. परिणामी पीसीआयने मान्यता देऊनही आचारसंहितेमुळे राज्य सरकारला नव्या महाविद्यालयांना मान्यता देता आली नाही. त्यामुळे त्यांचा प्रवेश प्रक्रियेत समावेश होऊ शकला नाही. मात्र, पीसीआयने मान्यता दिलेल्या महाविद्यालयांचा समावेश प्रवेश प्रक्रियेत करावा लागणार असल्याने बी. फार्मसी आणि एम. फार्मसीच्या प्रवेशांना राज्य सरकारने स्थगिती दिली होती. मात्र, आता नव्या सरकारचे शपथविधी लवकर पार पडल्यास या प्रवेश प्रक्रियेला १ डिसेंबरनंतर गती मिळण्याची शक्यात आहे.