धक्कादायक: शिक्षिकेने मुलाच्या कानाखाली मारल्याचा जाब पालकांनी विचारला; शाळेने दाखलाच दिला हातात

एज्युवार्ता न्यूज नेटवर्क 

पुण्यातील वाघोली (Wagholi in Pune)येथील चैतन्य टेक्नो स्कूल (Chaitanya Techno School)या शाळेतील शिक्षकेने किरकोळ कारणावरून इयत्ता सातवीत शिकणाऱ्या विद्यार्थ्यांच्या दोन कानाखाली लगावल्या. त्यावर पालकांनी शाळेला जाब विचारून याबाबत पोलिसांकडे तक्रार केली. या गोष्टीचा राग मनात धरून शाळेच्या मुख्याध्यापकांनी विद्यार्थ्याला शाळेतून काढून टाकत त्याला शाळा सोडल्याचा दाखला (School leaving certificate)दिला. ही बाब गंभीर असून याप्रकरणी वाघोली पोलिसांकडे शाळेतील शिक्षकेविरोधात गुन्हा दाखल करण्यात आला आहे. शिक्षण विभागाकडून या प्रकरणी चौकशी केली जाणार असल्याचे पुणे विभागीय शिक्षण उपसंचालक गणपत मोरे यांनी सांगितले. 

 इयत्ता सातवीत शिकणारा विद्यार्थी शाळेच्या मधल्या सुट्टीत मित्रांबरोबर बाहेर उभा होता. त्यावर शिक्षकेने सर्व मुलांना वर्गात जाण्यास सांगितले. विद्यार्थी आपले ऐकत नाहीत, असा गैरसमज करून संबंधित शिक्षिकेने विद्यार्थ्याच्या कानाखाली मारल्या. त्यानंतर विद्यार्थ्यांच्या पालकांना फोन करून विद्यार्थ्यांचा कानाखाली मारल्यामुळे त्याचा कान दुखत आहे,असे सांगितले. त्यावर पालकांनी विद्यार्थ्यांला ससून रुग्णालयात उपचारासाठी दाखल केले व त्यांची वैद्यकीय तपासणी केली. मात्र, कानाच्या वेदना थांबत नसल्याने पालकांनी शाळेच्या मुख्याध्यापिकेकडे याप्रकरणी चौकशी केली. त्यातून पालकांना कोणतेही सहकार्य मिळाले नाही. याउलट आम्हाला न विचारता तुम्ही मुलाची वैद्यकीय तपासणी का केली व पोलिसांकडे का गेलात? अशी दमदाटी पालकांना शाळेकडून करण्यात आली. तसेच पालकांची कोणतीही इच्छा नसताना मुख्याध्यापिकांनी मुलाला शाळेतून काढून टाकण्यात आले असल्याचा मेल पालकांना पाठवला. या घटनेमुळे मुलगा मुलाला मानसिक धक्का बसला असून त्याचे परिणाम दैनंदिन व्यवहारांमध्ये दिसून येत आहेत. तसेच तो घाबरलेल्या अवस्थेत असतो, असे पालकांनी पोलिसांकडे दिलेल्या तक्रारी मध्ये नमूद करण्यात आले आहे.याबाबत शाळा प्रशासनाशी संपर्क साधण्याचा प्रयत्न केला असता,संपर्क होऊ शकला नाही. 

याबाबत पालकांशी संवाद साधला असता ते म्हणाले, आम्ही शाळेकडे सीसीटीव्ही फुटेज ची मागणी केली परंतु शाळा प्रशासनाने फुटेज उपलब्ध करून दिले नाही. त्याचप्रमाणे याप्रकरणी आम्ही जिल्हा परिषदेच्या शिक्षणाधिकाऱ्यांकडे शाळेविरोधात लेखी तक्रार करून कारवाईची मागणी केली आहे, असेही पालकांनी सांगितले.

----------------------------------------

पुणे जिल्हा परिषदेच्या शिक्षण विभागाकडे या प्रकरणी तक्रार प्राप्त झाली आहे. त्यानुसार संबंधित घटनेची चौकशी केली जाईल. पालकांच्या इच्छे विरोधात मुलांचा शाळा सोडल्याचा दाखला शाळेला देता येत नाही. त्यामुळे सर्व चौकशी करून अहवाल प्राप्त झाल्यावर शाळेविरोधात उचित कार्यवाही केली जाईल. 
- गणपत मोरे, शिक्षण उपसंचालक, पुणे विभाग