आयआयएम मध्ये पीएचडी प्रवेशासाठी आता आरक्षण

एज्युवार्ता न्यूज नेटवर्क

अनुसूचित जाती-जमाती, इतर मागासवर्गीय आणि अपंग असलेल्या उमेदवारांना देशातील सर्वोच्च व्यावसायिक शाळांमधून मॅनेजमेंट डॉक्टरेट प्रोग्राम (Management Doctorate Program) करता यावा यासाठी, इंडियन इन्स्टिट्यूट ऑफ मॅनेजमेंट अहमदाबादने (Indian Institute of Management Ahmedabad) एक ऐतिहासिक पाऊल उचलले आहे. संस्थेकडून पहिल्यांदाच पीएचडी अभ्यासक्रमांच्या प्रवेशासाठी आरक्षण प्रणाली (Reservation system for admission to PhD courses) सुरू करण्यात आली आहे. 

संस्थेच्या वतीने जाहीर करण्यात आलेल्या नोटीसमध्ये म्हटले आहे की, "प्रवेशाच्या वेळी आरक्षणाबाबत भारत सरकारच्या मार्गदर्शक तत्त्वांचे पालन केले जाईल." या निर्णयानंतर अनुसूचित जाती (SC)/अनुसूचित जमाती (ST)/अपंग व्यक्ती (PWD)/नॉन-क्रिमीलेअर इतर मागासवर्गीय (NC-OBC)/आर्थिकदृष्ट्या कमकुवत विभाग (EWS) च्या उमेदवारांना किमान पात्रता अटींमध्ये 5 टक्के गुणांची सूट दिली जाईल. मात्र आद्यप कोटा प्रणालीच्या अंमलबजावणीशी संबंधित तपशीलवार माहिती येणे बाकी आहे. यासंदर्भात लवकरच अधिसूचना जारी करण्यात येणार आहे, असेही संस्थेकडून सांगण्यात आले आहे. 

दरम्यान गुजरातच्या  'ग्लोबल आयआयएम ॲल्युमनी नेटवर्क' ने या संदर्भात गुजरात उच्च न्यायालयात जनहित याचिका (पीआयएल) दाखल केली होती. यामध्ये IIMA च्या पीएचडी कार्यक्रमांमध्ये आरक्षण लागू करण्याची मागणी करण्यात आली होती. 1971 मध्ये सुरू झालेल्या IIMA मधील पीएचडी कार्यक्रमात आरक्षण न देणे ही घटनात्मक तरतुद, म्हणजे केंद्रीय शैक्षणिक संस्था  CERA कायदा आणि विद्यापीठ अनुदान आयोगाच्या नियमांचे “घोर उल्लंघन” आहे, असे जनहित याचिकामध्ये म्हटले होते.