आंबेडकर जयंतीनिमित्त मराठवाडा विद्यापीठात 'राष्ट्रीय बुक फेस्टिव्हल महोत्सवा'चे आयोजन 

एज्युवार्ता न्यूज नेटवर्क 

डॉ. बाबासाहेब आंबेडकर मराठवाडा विद्यापीठ (Dr. Babasaheb Ambedkar Marathwada University) छत्रपती संभाजीनगर येथे बाबासाहेब आंबेडकर यांच्या जयंतीनिमित्त राष्ट्रीय बुक फेस्टिव्हल महोत्सावाचे (National Book Festival Celebration) आयोजन करण्यात येणार आहे. काही दिवसांपुर्वी पुण्यात पार पडलेल्या राष्ट्रीय बुक फेस्टिव्हलच्या धर्तीवर हा महोत्सव आयोजित करण्यात येणार आहे. या भव्य ग्रंथमहोत्सवाचे आयोजन ११ ते १४ एप्रिलच्या दरम्यान (Held between April 11th and 14th) इतिहास वस्तुसंग्रहालयाच्या मैदानावर केले जाणार आहे.  

या पुस्तक महोत्सवाला  देशपातळीवरील प्रकाशक सहभागी होणार असल्याची माहिती विद्यापीठ प्रशासनाने आयोजित पत्रकार परिषदेत दिली. तसेच संभाजीनगर जिल्ह्याचे  पालकमंत्री संजय शिरसाठ यांच्या हस्ते या महोत्सवाचे उद्घाटन होणार असल्याचे सांगण्यात आले आहे. विद्यापीठ प्रशासनाने या वर्षी भारतरत्न डॉ. बाबासाहेब आंबेडकर यांच्या जयंतीनिमित्त भरगच्च कार्यक्रमाचे आयोजन केले आहेत. 

विद्यापीठात ग्रंथ महोत्सव पाहण्यासाठी शाळा, महाविद्यालयातील विद्यार्थ्यांना आमंत्रित केले आहे. त्यासाठी महाविद्यालयांचे प्राचार्य, जिल्ह्याच्या शिक्षणाधिकाऱ्यांसोबत पत्रव्यवहार झाला असून, विद्यार्थी मोठ्या संख्येने सहभागी होतील, असे संचालक डॉ. वैशाली खापर्डे यांनी सांगितले. तसेच विद्यापीठात डॉ. बाबासाहेब आंबेडकर जयंती उत्सवासाठी १२ सदस्यीय समितीची स्थापना करण्यात आल्याचे सांगितले. 

डाॅ. बाबासाहेब आंबेडकर हे ज्ञानाचे प्रतीक असल्यामुळे कुलगुरू डॉ. विजय फुलारी यांच्या संकल्पनेनुसार भव्य ग्रंथमहोत्सव घेण्याचे नियोजन केले आहे. त्यासाठी राष्ट्रीय पातळीवरील प्रकाशन संस्थांना आमंत्रित केले आहे. 'मेळा पुस्तकांचा, समृद्ध वाचन संस्कृतीचा' हे ग्रंथमहोत्सवाचे ब्रीद असून, पहिल्यांदाच विद्यापीठात असा ग्रंथ महोत्सव होत आहे. यावेळी परीक्षा संचालक डॉ. भारती गवळी, ज्ञानस्रोत केंद्र संचालक डॉ. वैशाली खापर्डे, विद्यार्थी विकास संचालक डॉ. कैलास अंभुरे, उपकुलसचिव डॉ. विष्णू कन्हाळे यांची उपस्थिती होती.