यवतमाळ हादरलं! सहा महिन्यात तब्बल ३४ अल्पवयीन मुली गायब, ऑडिओ क्लिप व्हायरल...

एज्युवार्ता न्यूज नेटवर्क 

यवतमाळ जिल्ह्यातील राळेगाव तालुक्यात ऑक्टोबर २०२५ ते एप्रिल २०२६ या सहा महिन्यांत आदिवासी समाजातील तब्बल ३४ अल्पवयीन मुली बेपत्ता (34 Minor Girls Missing) झाल्याची धक्कादायक माहिती समोर आली आहे. एक मुलगी आणि तिच्या प्रियकरातील कथित ऑडिओ क्लिप (Audio clip goes viral) हाती लागल्याने त्याची पुष्टी झाली आहे. यामध्ये काही अल्पवयीन शाळकरी व महाविद्यालयीन तरूणींचा (School and College Students) समावेश असल्याची शंका व्यक्त करण्यात आली आहे. या प्रकरणाने संपूर्ण विदर्भात खळबळ उडवली असून, आदिवासी विकासमंत्री डॉ. अशोक उईके (Dr. Ashok Uike) यांच्या मतदारसंघातच ही घटना घडल्याने राजकीय वादळ निर्माण झाले आहे.

शाळा, महाविद्यलयात शिकणाऱ्या अल्पवयीन मुलींच्या पालकांना पैशांचे आमिष दाखवून, तसेच प्रेमाच्या जाळ्यात अडकवले जाते व फूस लावली जाते. त्यांनंतर त्यांना पुणे, मुंबई, बंगळुरूसारख्या शहरांत देहविक्री करण्यासाठी विकले जाते. यामागे मोठ्या प्रमाणावर मानवी तस्करी, देहव्यापार आणि लव्ह जिहादचा रॅकेट असल्याचा गंभीर आरोप यवतमाळ भाजप जिल्हाध्यक्ष ॲड. प्रफुल्ल चव्हाण यांनी केला आहे.  

आरोपांची दखल घेत आदिवासी विकासमंत्री डॉ. अशोक उईके यांनी तातडीने अप्पर पोलीस अधीक्षकांची भेट घेतली. त्यांनी यवतमाळ पोलिस अधीक्षकांना सखोल चौकशीचे आदेश दिले असून, “लव्ह जिहाद, धर्मांतरण आणि तस्करीचा कोणताही अँगल असला तरी तपास करा,” असे स्पष्ट निर्देश दिले आहेत. पोलिसांकडून सध्या तपास सुरू असून, काही संशयितांना ताब्यात घेतल्याची माहिती समोर येत आहे.

या घटनेमुळे आदिवासी समाजातील पालकांमध्ये भीतीचे वातावरण आहे. अनेक पालक मुलींच्या सुरक्षिततेची चिंता व्यक्त करत आहेत. नाशिक, परतवाडा प्रकरणानंतर आता राळेगावात ही घटना समोर आल्याने राज्य सरकारवर दबाव वाढला आहे. पोलिसांनी लवकरात लवकर मुलींचा शोध घेऊन आरोपींवर कठोर कारवाई करावी, अशी मागणी जोर धरत आहे.