नागपूर विद्यापीठाची पेट परीक्षा जाहीर, २४ जानेवारीपासून नोंदणी सुरू 

एज्युवार्ता न्यूज नेटवर्क 

पीएचडी परीक्षेच्या प्रतीक्षेत असणाऱ्या विद्यार्थ्यांसाठी महत्त्वाची अपडेट समोर आली. राष्ट्रसंत तुकडोजी महाराज नागपूर विद्यापीठाकडून (Rashtrasant Tukadoji Maharaj Nagpur University) पीएचडी नोंदणीसाठी आवश्यक असलेल्या पेट परीक्षेची (PhD Entrance Test) घोषणा करण्यात आली (Pet exam announced) आहे. या परीक्षेत सहभागी होणाऱ्या इच्छुक आणि  पात्र उमेदवारांना २४ जानेवारीपासून नोंदणी करता येणार असून नोंदणी करण्याची अंतिम मुदत २ फेब्रुवारीपर्यंत (Deadline February 2) असणार आहे. 

नोंदणी प्रक्रिया पूर्ण झाल्यानंतर अवघ्या २५ दिवसांत परीक्षेचे आयोजन करण्यात आले आहे. विद्यापीठाने प्रसिद्ध केलेल्या वेळापत्रकानुसार २७ आणि २८ अशा दोन दिवशी परीक्षा घेण्यात येणार आहे. सर्व साधारण नागपूर विद्यापीठाकडून सप्टेंबर ते ऑक्टोबरमध्ये 'पेट' परीक्षेचे वेळापत्रक घोषित करण्यात येते. ऑक्टोबर ते नोव्हेंबरपर्यंत निकाल लागून पुढील प्रवेश प्रक्रिया देखील सुरू होते. मात्र, यंदा या परीक्षेबाबात कुठलीही घोषणा करण्यात आलेली नव्हती. त्यामुळे पीएचडी नोंदणी प्रक्रियेचा वेग संथ झाला. 

यापूर्वी ऑगस्ट महिन्यात 'पेट' परीक्षेचा पहिला टप्पा व सप्टेंबरमध्ये दुसरा टप्पा आयोजित करण्यात येत होता. सप्टेंबर महिन्यात निकालदेखील घोषित झाले होते. मात्र, यंदा वेळापत्रक न आल्याने विद्यार्थी संभ्रमात होते. मात्र, सोमवार दि. ६ जानेवारी रोजी विद्यापीठाने अखेर परीक्षेची घोषणा केली. त्यानुसार २४ जानेवारीपासून अर्ज नोंदणीला सुरुवात होणार आहे, तर १२ फेब्रुवारीपासून प्रवेशपत्र मिळणार आहेत आणि  २७ आणि २८ फेब्रुवारी परीक्षा पार पडणार आहेत.