मुकेश अंबानी यांनी शिक्षण घेतलेल्या 'आयसीटी; संस्थेला दिली १५१ कोटींची देणगी 

एज्युवार्ता न्यूज नेटवर्क

प्रसिद्ध उद्योगपती मुकेश अंबानी (Mukesh Ambani) यांनी ज्या शिक्षण संस्थेतून पदवीचे शिक्षण पूर्ण केले त्या संस्थेला तब्बल १५१ कोटींची देणगी (Donation of Rs. 151 crore) दिली आहे. अंबानी यांनी १९७० मध्ये मुंबईतील इन्स्टिट्यूट ऑफ केमिकल टेक्नॉलॉजी (आयसीटी) संस्थेतून इंजिनिअरिंगची पदवी घेतली होती. आता ५५ वर्षानंतर त्यांनी आपल्याला चांगले शिक्षण दिलेल्या संस्थेची जान ठेवत ही देणगी दिली आहे. ही देणगी नव्हे तर गुरुदक्षिणा असल्याचे अंबानी यावेळी स्पष्ट केले. 

इन्स्टिट्यूट ऑफ केमिकल टेक्नॉलॉजी (आयसीटी) ही संस्था यापूर्वी युनिव्हर्सिटी डिपार्टमेंट ऑफ केमिकल टेक्नॉलॉजी या नावाने ओळखली जात होती. या संस्थेतून अंबानी यांनी १९७० च्या दशकात केमिकल इंजिनिअरिंगची पदवी घेतली होती. प्रसिद्ध संशोधक आणि प्रा. एम. एम. शर्मा यांनी लिहिलेल्या 'डिव्हाइन सायंटिस्ट' या पुस्तकाच्या प्रकाशनासाठी मुकेश अंबानी आयसीटी संस्थेमध्ये आले होते. त्यावेळी त्यांनी या देणगीची घोषणा केली. 

यावेळी बोलताना मुकेश अंबानी म्हणाले, मी विद्यार्थी असताना प्राध्यापक शर्मा यांचे पहिलेच लेक्चर ऐकून मी प्रभावित झालो होतो. भारताच्या आधुनिकीकरणामध्ये प्रा. शर्मा यांचे उत्तुंग योगदान आहे. माझ्या वडिलांप्रमाणेच त्यांनादेखील भारताचा चेहरा बदलण्याचा ध्यास होता आणि त्यांनी ज्ञानदान करण्यासोबतच उद्योगाचा चेहरा बदलण्यासाठी मोठे काम केले आहे.

गरीब भारत ते जागतिक नेतृत्व करणारा भारत असा बदल करण्यात त्यांचे मोठे योगदान आहे. यावेळी अंबानी यांनी प्रा. शर्मा याचा 'राष्ट्रगुरु' असा उल्लेख करत गौरव केला. तसेच, आयसीटी या संस्थेसाठी तुम्ही काहीतरी मोठे करण्याची आवश्यकता असल्याचे प्रा. शर्मा यांनी आपल्याला सांगितले. त्यांनी सांगितले की त्यांचे ऐकायचे हा आमचा शिरस्ता आहे. त्यामुळेच मी १५१ कोटी रुपयांची देणगी नव्हे तर गुरुदक्षिणा देत असल्याचे अंबानी यावेळी जाहीर केले.