मराठी भाषा दिनाच्या पूर्वसंध्येला मराठीचा अपमान? नामांकित कॉलेजचे नाव गुजराती भाषेत

एज्युवार्ता न्यूज नेटवर्क 

महाराष्ट्रात दरवर्षी २७ फेब्रुवारीला 'मराठी भाषा दिन' (Marathi Language Day) साजरा केला जातो. मात्र, त्याच्या पूर्वसंध्येलाच मराठीचा अवमान (Insult to Marathi) करणारी घटना समोर आली आहे. कांदिवली येथील बालभारती कॉलेज प्रशासनाची (Balbharti College Kandivali) एवढी हिंमत वाढलीय की, या कॉलेजचे नाव गुजराती भाषेत (College name in Gujarati language) लिहिल्याचे समोर आले आहे. एकीकडे राज्यात मराठी भाषा दिनानिमित्त विविध कार्यक्रम आयोजित केले जात आहेत. तर दुसरीकडे मुंबईत हा मराठीचा अपमान करणारा धक्कादायक प्रकार समोर आला आहे.  

मुंबईतील कांदिवली पश्चिम भागात असलेल्या बालभारती मगनलाल जे. पांचोलिया कॉलेज ऑफ कॉमर्स या कॉलेजचे नाव मुख्य प्रवेशद्वारावर मराठीऐवजी गुजराती भाषेत लिहिण्यात आल्याचे समोर आले आहे. यामुळे मोठा वाद निर्माण झाला आहे. मुंबई विद्यापीठ यांच्या आदेशानुसार महाविद्यालयांचे नाव मराठी भाषेत असणे बंधनकारक असल्याचे सांगितले जाते. विद्यापीठाचा स्पष्ट आदेश असतानाही कॉलेजचे नाव गुजराती भाषेतच दिसत असल्याने प्रश्नचिन्ह उपस्थित केले जात आहे. 

दरम्यान, या घटनेनंतर युवा सेना ठाकरे गटाचे पदाधिकारी आणि स्थानिकांनी आक्रमक भूमिका घेत संबंधित कॉलेज प्रशासनावर कारवाई करण्याची मागणी केली आहे. मराठी भाषेचा सन्मान राखला गेला पाहिजे, असा त्यांचा ठाम आग्रह आहे. मुंबई विद्यापीठाने स्पष्ट निर्देश देऊनही जर महाविद्यालय प्रशासन नियम पाळत नसेल, तर त्यांच्यावर कडक दंडात्मक कारवाई करावी आणि त्यांची मान्यता रद्द करण्याबाबत विचार करावा, अशी मागणी केली जात आहे. या प्रकरणात विद्यापीठ प्रशासन आणि कॉलेज व्यवस्थापन काय भूमिका घेतात, याकडे सर्वांचे लक्ष लागले आहे.

महाराष्ट्र राज्याच्या नियमांनुसार, सर्व शैक्षणिक संस्थांच्या दर्शनी भागावरील नामफलक हे मराठी भाषेत असावे, असा नियम आहे. इतर कोणत्याही भाषेपेक्षा मराठी भाषेतील नाव हे मोठ्या किंवा समान आकारात असणे अनिवार्य आहे. मात्र कांदिवलीच्या या महाविद्यालयाने मुंबई विद्यापीठ आणि राज्य शासनाच्या या आदेशाला केराची टोपली दाखवली आहे. त्यांनी प्रवेशद्वारावर फक्त गुजराती भाषेतील फलक लावल्याचा आरोप होत आहे.