'MIT'ला अडीच कोटींचा गंडा घालणाऱ्याला हैद्राबादमधून अटक; पुणे सायबर पोलिसांची कारवाई

एज्युवार्ता न्यूज नेटवर्क

सावित्रीबाई फुले पुणे विद्यापीठाच्या माजी कुलगुरूंचे (Former Vice Chancellor of Savitribai Phule Pune University) नाव वापरून आणि आयआयटी बॉम्बे येथील प्राध्यापक (Professor at IIT Bombay)असल्याचे सांगून पुण्यातील कोथरूड येथील एमआयटी संस्थेला (MIT Institute in Kothrud)तब्बल अडीच कोटी रुपयांचा गंडा घालणाऱ्याला पुणे सायबर पोलिसांनी सापळा रचून हैदराबाद येथून अटक केली. पुणे पोलिसांनी त्याला न्यायालयात हजर केले असून न्यायालयाने त्याला येत्या 28 सप्टेंबरपर्यंत पोलीस कस्टडी रिमांड दिले आहे.

सितैया किलारू( वय ३४ वर्षे, रा. मेहेर रोड, याप्रल, हैद्राबाद तेलंगणा) असे आरोपीचे नाव असून सितैया किलारू हा या गुन्ह्याचा मुख्य सूत्रधार आहे. पोलिसांनी दिलेल्या माहितीनुसार पुणे शहर सायबर पोलीस स्टेशन येथे दाखल गुन्ह्यामध्ये Bombay IIT येथील प्रतिष्ठीत प्रोफेसरचे नाव वापरुन शासनाचे AI व Drone प्रकल्प देण्याच्या बहाण्याने फिर्यादी यांचा विश्वास संपादन करुन त्यांना वारंवार मेल व व्हॉट्सअॅप कॉलव्दारे त्यांची दिशाभूल करुन त्यांना पैसे भरण्यास भाग पाडुन फिर्यादी प्रोफेसर असलेल्या पुण्याच्या नामांकीत Engg. College ची एकूण २ कोटी ४६ लाख  रुपयेची आर्थिक फसवणुक केली. त्यामुळे याबाबतचा गुन्हा ०६ सप्टेंबर रोजी दाखल करण्यात आला.

या गुन्ह्याचे तपासी अधिकारी वरिष्ठ पोलिस निरीक्षक स्वप्नाली शिंदे यांनी दाखल गुन्ह्याचा सखोल तपास केला. तसेच गुन्ह्यातील मिळुन आलेल्या माहितीचे तांत्रिक विश्लेषणद्वारे यातील फिर्यादी यांच्या विद्यापीठाची एकूण २ कोटी ४६ लाख  रकमेची आर्थिक फसवणूक करणाऱ्या व्यक्तीचे नाव हे Bombay IIT येथील प्रोफेसरचे नसून ते सितैया किलारु असे असल्याचे तपासात निष्पन्न झाले. त्यानंतर गुन्ह्यातील आरोपीस ताब्यात घेण्यासाठी १८ सप्टेंबर रोजी स्वप्नाली शिंदे व सायबर पोलीस पथक हैद्राबाद येथे रवाना झाले. हैद्राबाद येथे २१ सप्टेंबर रोजी आरोपीचा शोध घेणेकरीता साई नगर, प्रगती नगर, निजामपेठ, गच्चीबावली, याप्रल याठिकाणी कसोशीने शोध घेतला असता तो याप्रल, हैद्राबाद येथे असल्याची खात्रीशीर माहिती मिळाल्यावर सापळा रचून त्यास शिताफिने पकडून ताब्यात घेतले. त्याच्याकडे गुन्ह्याच्या अनुषंगाने विचारपूस करता तो स्वतः गुन्ह्याचा मुख्य सूत्रधार असल्याचे खात्री पटल्याने त्यास अटक केली.

आरोपीकडून आत्तापर्यंत १० डेबीटकार्ड, १३ पासबुक, १५ चेकबुक, एक ०५ जी सीमकार्ड, सोने खरेदी पावत्या, इतर कागदपत्रे, ७० हजार रुपये किमतीचे ४ मोबाईल, ०१ टॅब, ०१ लॅपटॉप, १,०५,०००/-रूपये रकमेचे पिवळ्या धातुचे दागिने, तसेच ४० लाख रुपये किमतीची एक टोयोटा इनोव्हा कार व ८ लाख रुपये किमतीची एक किया सोनेट कार असा मुद्देमाल (एकूण ४९ लाख ७५ हजार रुपये किमतीचा मुद्देमाल जप्त करण्यात आले आहे.आरोपीताचा हैद्राबाद न्यायालयाकडून ट्रान्झिट रिमांड घेऊन त्यास पुणे येथे आणण्यात आले असून न्यायालयाने आरोपीची 28 सप्टेंबरपर्यंत पोलीस कस्टडी रिमांड मंजूर केली आहे.