महात्मा फुले कृषी विद्यापीठाचे कुलगुरू डॉ. प्रशांतकुमार पाटील यांचे निधन

एज्युवार्ता न्यूज नेटवर्क 

राहुरी येथील महात्मा फुले कृषी विद्यापीठाचे (Mahatma Phule Agricultural University Rahuri) कुलगुरू डॉ. प्रशांतकुमार पाटील (Vice Chancellor Dr. Prashant Kumar Patil) (वय ५४) यांचे अल्पशा आजाराने निधन झाले. त्यांच्या पश्चात वडील, पत्नी व दोन मुले आहेत. त्यांच्या मूळ गावी कवठे महांकाळ  (ता. तासगाव) येथे त्यांच्यावर अंत्यसंस्कार करण्यात आले. मागील काही दिवसांपासून पुणे येथील रुबी हॉस्पिटलमध्ये त्यांच्यावर उपचार सुरू होते. उपचारादरम्यान त्यांची प्राणज्योत मालवली. त्यानंतर त्यांचे पार्थिव पुणे कृषी महाविद्यालय येथे अंत्यदर्शनासाठी आणण्यात आले. यावेळी राहुरी विद्यापीठाचे प्रभारी कुलगुरू डॉ. साताप्पा खरबडे, संचालक डॉ. विठ्ठल शिर्के यांच्यासह सर्व कर्मचाऱ्यांनी श्रद्धांजली वाहिली. 

महात्मा फुले कृषी विद्यापीठाच्या कुलगुरू पदाचा पदभार सांभळण्यापूर्वी त्यांनी मुंबई येथील केंद्रीय कापूस तंत्रज्ञान संशोधन संस्थेच्या (सिर्कोट) संचालक पदाची व तंत्रज्ञान हस्तांकरण प्रमुख ही महत्वाची पदे भुषवली. काही काळ त्यांनी यशवंतराव चव्हाण मुक्त विद्यापीठ, नाशिक येथील प्रभारी कुलगुरू या पदाचा देखील कारभार सांभाळला होता. कृषी क्षेत्रातील संशोधन व विस्तार उपक्रमातील सेवेचा त्यांना ३३ वर्षांचा प्रदिर्घ अनुभव होता. ४ पुस्तके, १९९ संशोधनात्मक पेपर, तांत्रिक शिक्षणासंबंधीची १४ पुस्तके व १ पेटंन्ट त्यांच्या नावावर जमा आहे.

राहुरी कृषी विद्यापीठामध्ये कुलगुरू पदाची धुरा सांभाळल्यानंतर त्यांनी सुयोग्य निर्णय घेऊन शिक्षण, संशोधन व विस्तार कार्यात विद्यापीठाला नावलौकिक मिळवून दिला. त्यांच्या कुशल नेतृत्वामुळे विद्यापीठाला नुकतेच उत्कृष्ट 'ए' ग्रेड मानांकन प्राप्त झाले आहे. कर्मचारी, अधिकारी व शेतकऱ्यांच्या हिताचे बरेचसे निर्णय त्यांनी घेतले. यामध्ये विद्यापीठातील कर्मचाऱ्यांकरीता कारकीर्द प्रगती योजना, १२/२४ आश्वासित प्रगती योजना, कर्मचाऱ्यांच्या सोयीस्कर पदस्थापना, अनुकंपा भरती, सेवानिवृत्ती लाभ व सेवानिवृत्त कर्मचाऱ्यांना सुधारित निवृत्तीवेतन, विद्यापीठ प्रकल्पग्रस्तांची जाहिरात या गोष्टींचा समावेश आहे.