शिवाजी विद्यापीठात एमएससी, एमकॉम अभ्यासक्रम ऑनलाईन पद्धतीने करता येणार पूर्ण
कोल्हापूर येथील शिवाजी विद्यापीठाला आयोगाने एमकाॅम, एमएससी (गणित) या अभ्यासक्रमांना ऑनलाइन पद्धतीने प्रवेश देण्यासाठी मान्यता देण्यात आली असल्याची माहिती विद्यापीठ प्रशासनाकडून देण्यात आली आहे.
eduvarta@gmail.com 
एज्युवार्ता न्यूज नेटवर्क
कोल्हापूर येथील शिवाजी विद्यापीठाला (Shivaji University Kolhapur) नुकताच 'नॅक ए मानांकन' व विद्यापीठ अनुदान आयोगाने (University Grants Commission) कॅटेगिरी दर्जा बहाल केला आहे. त्यानंतर आता आयोगाने एमकाॅम, एमएससी (गणित) या अभ्यासक्रमांना ऑनलाइन (MCom, MSc Online Courses) पद्धतीने प्रवेश देण्यासाठी मान्यता देण्यात आली असल्याची माहिती विद्यापीठ प्रशासनाकडून देण्यात आली आहे. त्यामुळे आगामी काळात विद्यार्थ्यांना आपली नोकरी, व्यवसाय सांभाळत हा अभ्यासक्रम पूर्ण करता येणार आहे.
एम.बी.ए. अभ्यासक्रम यापूर्वीच ऑनलाइन पद्धतीने सुरू करण्यास नवी दिल्ली येथील विद्यापीठ अनुदान आयोगाच्या दूरस्थ शिक्षण परिषद, तसेच एआयसीटीई या संस्थांकडून ऑनलाइन एमबीए, अभ्यासक्रमाला मान्यता मिळाली होती. त्यानुसार हा अभ्यासक्रम ऑनलाइन पद्धतीने सुरू असून, त्याला चांगला प्रतिसाद मिळत असल्याची माहिती विद्यापीठ प्रशासनाने दिली आहे. अशातच आता एमएस्सी (गणित) व एमकॉम या अभ्यासक्रमांना ऑनलाइन पद्धतीने प्रवेश देण्यासाठी मान्यता मिळाली असल्याने विद्यापीठाच्या शैक्षणिक वाटचालीतील महत्त्वाचा टप्पा ठरला आहे.
एमबीए, एमकॉम, एमएस्सी (गणित) हे ऑनलाईन अभ्यासक्रम सुरू करणारे शिवाजी विद्यापीठ हे महाराष्ट्रातील एकमेव सार्वजनिक विद्यापीठ ठरले आहे. यामुळे विद्यार्थ्यांना नोकरी, व्यवसाय सांभाळत ऑनलाइन एमबीए, एमकॉम, एमएस्सी (गणित), अभ्यासक्रमाची पदवी घेता येणार आहे. हा अभ्यासक्रम प्रवेश, अध्ययन, परीक्षा व निकालापर्यंत असणारी सर्व शैक्षणिक प्रक्रिया ऑनलाइन स्वरूपाची असणार आहे. ऑनलाइन अभ्यासक्रमाच्या पदवी कोणत्याही मान्यता विद्यापीठाच्या समकक्ष आहे.
एमबीए, एमकॉम व एमएस्सी (गणित) या ऑनलाइन अभ्यासक्रमासाठी सुसज्ज अशा लर्निंग मॅनेजमेंट सिस्टीमद्वारे विषयतज्ज्ञांनी विकसित केलेले व्हीडिओ लेक्चर्स, ई-बुक्स लाउव्ह काउंसलिंग सेशन, डिस्कशन फोरम, प्रॅक्टिस टेस्टच्या माध्यमातून अभ्यासक्रम पूर्ण करण्याची संधी विद्यार्थ्यांना मिळणार आहे, तसेच विद्यापीठाच्या प्लेसमेंट सेलच्या माध्यमातून रोजगाराची संधी उपलब्ध करून देण्यात येणार असल्याची माहिती विद्यापीठाकडून देण्यात आली आहे.
