सायबर सुरक्षा जनजागृती सत्र व इंटरॅक्ट क्लबचे उद्घाटन

एज्युवार्ता न्यूज नेटवर्क 

एमईएस बाल शिक्षण मंदिर इंग्लिश मीडियम स्कूल येथे रोटरी क्लब ऑफ पुणे गांधी भवन व कात्रज यांच्या संयुक्त विद्यमाने इयत्ता आठवी व नववीच्या विद्यार्थ्यांसाठी सायबर सुरक्षा जनजागृती सत्राचे आयोजन करण्यात आले.

या सत्रात विद्यार्थ्यांना सुरक्षित इंटरनेट वापर, सोशल मीडियावरील सुरक्षितता, सायबर बुलिंग, फिशिंग, ऑनलाइन फसवणूक, मालवेअर, ओळख चोरी (आयडेंटिटी थेफ्ट) तसेच डिजिटल फूटप्रिंटचे महत्त्व याविषयी मार्गदर्शन करण्यात आले.

अॅड. वैशाली भागवत यांनी विद्यार्थ्यांना सायबर सुरक्षेबाबत विविध उदाहरणांसह माहिती दिली. प्रश्नोत्तरांच्या संवादात्मक सत्रात विद्यार्थ्यांनी उत्स्फूर्त सहभाग नोंदवून दैनंदिन जीवनातील डिजिटल सुरक्षेबाबतच्या शंकांचे निरसन करून घेतले. यावेळी विद्यार्थ्यांनी सुरक्षित ऑनलाइन सवयी अंगीकारण्याचा निर्धार व्यक्त केला.

याच कार्यक्रमात रोटरी क्लबच्या वतीने शाळेच्या इंटरॅक्ट क्लबचे उद्घाटन करण्यात आले. विद्यार्थ्यांमध्ये नेतृत्वगुण, सामाजिक बांधिलकी आणि सेवाभाव विकसित करण्याच्या उद्देशाने या क्लबची स्थापना करण्यात आली. उद्घाटनप्रसंगी सदस्य विद्यार्थ्यांना इंटरॅक्ट क्लबचे बॅज प्रदान करण्यात आले. रोटरीच्या युवक सक्षमीकरणाच्या संकल्पनेला चालना देणारा हा उपक्रम असल्याचे यावेळी नमूद करण्यात आले.

सायबर सुरक्षेबाबत विद्यार्थ्यांमध्ये जागरूकता निर्माण करण्याबरोबरच सामाजिक नेतृत्वाची बीजे पेरणारा हा उपक्रम यशस्वी ठरल्याची भावना उपस्थितांनी व्यक्त केली.