पुण्यातील सायकल स्पर्धेमुळे जेईई मेन परीक्षार्थींना 'रस्ते बंद'चा बसणार फटका

एज्युवार्ता न्यूज नेटवर्क 

अभियांत्रिकी आणि तंत्रज्ञान अभ्यासक्रमाच्या (Engineering and technology courses) प्रवेशासाठी घेण्यात येणारी पहिल्या सत्रातील जेईई मेन परीक्षा (JEE Main exam in the first session) २१ ते २४ जानेवारी या कालावधीत पार पडणार आहे. मात्र, पुण्यात 'पुणे ग्रँड टूर' ही आंतरराष्ट्रीय सायकल स्पर्धा (International cycling competition) होत असून यानिमित्त शहराच्या विविध भागातील वाहतुकीत बदल केल्याने अनेक रस्ते बंद राहणार आहेत. त्यामुळे 'जेईई मेन' परीक्षा देणाऱ्या विद्यार्थ्यांना वेळेत परीक्षा केंद्रावर पोचण्यासाठी अनेक अडचणींचा (Difficulties due to road transport) सामना करावा लागणार आहे. त्यासाठी विद्यार्थ्यांनी पुणे वाहतुक पोलिसांचे (Pune Traffic Police) संकेतस्थळ वेळोवेळी तपासणे आवश्यक आहे. 

हेही वाचा - पुण्यातील शाळा, कॉलेजला बुधवारी पुन्हा सुट्टी; जिल्हाधिकाऱ्यांचे आदेश

देशातील राष्ट्रीय पातळीवरील नामांकित संस्थांमध्ये अभियांत्रिकी व तंत्रज्ञान अभ्यासक्रमाच्या प्रवेशासाठी राष्ट्रीय टेस्टिंग एजन्सीमार्फत जेईई मेन परीक्षा घेण्यात येते. ही परीक्षा दोन सत्रांमध्ये घेतली जाते. पहिल्या सत्रातील जेईई मेन परीक्षा जानेवारी २०२६ मध्ये, तर दुसरे सत्रातील परीक्षा एप्रिल २०२६ मध्ये होणार आहे. पहिल्या सत्रातील जेईई मेन परीक्षा २१, २२, २३ आणि २४ जानेवारी (पेपर एक- बी.ई/बी.टेक), तर २८ आणि २९ जानेवारीला (पेपर एक- बी.ई/बी.टेक, पेपर दोन- बी. आर्च, बी. प्लॅनिंग, बी. आर्च आणि बी. प्लॅनिंग) होणार आहे.

दरम्यान, पुण्यातील हजारो विद्यार्थी ही परीक्षा देतात. या परीक्षेच्या काळात पुण्यात 'पुणे ग्रँड टूर' होत असून यानिमित्त शहरातील वाहतुकीत बदल केला आहे. वाहतूकीतील बदलामुळे शहरातील अनेक रस्ते बुधवारी दि. २१ ते शुक्रवारी दि. २३ या कालावधीत बंद असणार आहेत. याच काळात 'जेईई मेन'ची स्पर्धा होत असल्याने परीक्षा केंद्राच्या ठिकाणी पोचण्यासाठी परीक्षार्थीना वाट काढत जावे लागणार आहे. 

'जेईई मेन' परीक्षा सकाळ आणि दुपारच्या सत्रात होत आहे. सकाळच्या सत्रात सकाळी ९ ते दुपारी १२ आणि दुपारच्या सत्रात दुपारी ३ ते सायंकाळी ६ यावेळेत परीक्षा असणार आहे. त्यामुळे विद्यार्थी-पालकांना वेळेचे नियोजन करून जेईई मेन परीक्षेचे केंद्र गाठावे लागणार आहे.