दहावी गणित व विज्ञान विषयांच्या उत्तीर्णतेचे निकष जाहीर

एज्युवार्ता न्यूज नेटवर्क 

महाराष्ट्र राज्य माध्यमिक व उच्च माध्यमिक शिक्षण मंडळामार्फत (Maharashtra State Board of Secondary and Higher Secondary Education) फेब्रुवारी-मार्च २०२५ मध्ये (February-March 2025 Exam) घेण्यात येणाऱ्या माध्यमिक शालान्त प्रमाणपत्र (इ.१०वी) परीक्षेत गणित आणि विज्ञान या विषयांकरिता उत्तीर्णतेचे निकष (Passing criteria for Mathematics and Science) 'जैसे थे' ठेवण्यात आले आहेत. ज्यावर्षी या निकषात बदल होतील त्यावेळी मंडळामार्फत स्वतंत्ररित्या कळविण्यात येईल, याची नोंद सर्व शाळा, मुख्याध्यापक, शिक्षक, विद्यार्थी, पालक व अन्य संबंधीत घटक यांनी घ्यावी, अशा सूचना शिक्षण मंडळाकडून देण्यात आल्या आहेत.

दहावीच्या परीक्षेत गणित व विज्ञान विषयाची परीक्षा आवश्यक गुणांसह उत्तीर्ण होण्याचे दडपण अनेक विद्यार्थ्यांना असते. त्या पार्श्वभूमीवर या विषयांत उत्तीर्ण होण्यासाठी गुणमर्यादा ३५ वरून २० करण्यात आल्याच्या बातम्या माध्यमांतून प्रसिद्ध करण्यात आल्या होत्या. मात्र, आता त्यावर शिक्षण विभागाने स्पष्टीकरण दिले आहे. गणित आणि विज्ञान या विषयांकरिता उत्तीर्णतेचे निकष मंडळाच्या प्रचलित पध्दतीप्रमाणेच असणार आहेत, असे सांगण्यात आले आहे. 

यााबाबत राज्य अभ्यासक्रमात तरतूद करण्यात आली असून राज्य सरकारने नियुक्त केलेल्या सुकाणू समितीने त्याला मान्यता दिली आहे. मात्र, यंदाच्या परीक्षेत त्यानुसार कोणत्याही बदल करण्यात येणार नसल्याचे राज्य माध्यमिक व उच्च माध्यमिक शिक्षण मंडळाने स्पष्ट केले आहे. 

फेब्रुवारी- मार्च २०२५ मध्ये होणाऱ्या दहावी बोर्डाच्या परीक्षांचे अंतिम वेळापत्रक नुकतेच प्रसिद्ध करण्यात आलेली आहेत. महाराष्ट्र राज्य माध्यमिक शिक्षण मंडळमार्फत पुणे, नागपूर, छ. संभाजीनगर, मुंबई, कोल्हापूर, अमरावती, नाशिक, लातूर व कोकण या नऊ विभागीय पार पडणार आहेत.