जात प्रवर्गाचा उल्लेख असलेले हॉल तिकीट बोर्डाकडून रद्द; नव्याने हॉल तिकीट देणार 

एज्युवार्ता न्यूज नेटवर्क 

महाराष्ट्र राज्य माध्यमिक व उच्च माध्यमिक शिक्षण मंडळातर्फे (SSC - HSC Board) इयत्ता बारावीच्या (12th) विद्यार्थ्यांना उपलब्ध करून दिलेली जात प्रवर्गाचा उल्लेख असलेली प्रवेश पत्र (हॉल तिकीट- Hall Tikit) रद्द करण्यात आली आहेत. विद्यार्थ्यांना येत्या 23 जानेवारीपासून नव्याने तयार केलेली हॉल तिकीट राज्य मंडळाच्या संकेतस्थळावरून डाऊनलोड करून घेण्यासाठी दिली जाणार आहेत, असे राज्य मंडळाचे सचिव देविदास कुलाळ यांनी परिपत्रकाद्वारे कळविले आहे.

राज्य मंडळाच्या नऊ विभागीय मंडळाच्या माध्यमातून 10 जानेवारी पासून दहावीच्या सर्व विद्यार्थ्यांना ऑनलाइन प्रवेश पत्र उपलब्ध करून देण्यात आली होती. मात्र, त्यावर विद्यार्थ्यांच्या जात प्रवर्गाचा उल्लेख करण्यात आला होता. त्यावर शिक्षण क्षेत्रासह राजकीय क्षेत्रातील व्यक्तींकडूनही टीका केली. त्यामुळे राज्य मंडळाने सर्व प्रवेश पत्र रद्द करण्याचा निर्णय घेतला आहे, राज्य मंडळांनी याबाबतचे परिपत्रक प्रसिद्ध केले आहे. 

इयत्ता दहावीच्या विद्यार्थ्यांसाठी विभागीय मंडळातर्फे उपलब्ध करून देण्यात आलेली प्रवेश पत्र जात प्रवर्गाचा उल्लेख असल्यामुळे ती सुद्धा रद्द केली आहेत विद्यार्थ्यांना ही प्रवेश पत्र राज्य मंडळाच्या संकेतस्थळावरून 20 जानेवारी रोजी दुपारी तीन वाजल्यापासून डाऊनलोड करून घेता येणार आहेत असेही राज्य मंडळाचे सचिव देविदास कुलाळ यांनी कळविले आहे.