'पवित्र पोर्टल'वर शिक्षक भरतीची सर्वसाधारण यादी जाहीर, 

एज्युवार्ता न्यूज नेटवर्क 

मागील दोन वर्षापासून चेतकाप्रमाणे वाट पाहाणाऱ्या भावी शिक्षकांसाठी महत्त्वाची अपडेट समोर आली आहे. पवित्र प्रणाली (Pavitra Portal) अंतर्गत शिक्षक अभियोग्यता व बुद्धिमत्ता चाचणी-२०२२ (Aptitude and Intelligence Test-2022) नुसार मुलाखतीसह शिक्षक पद भरतीमध्ये (Teacher Recruitment) प्राथमिक, माध्यमिक व उच्च माध्यमिक या गटातील शिक्षण सेवकांच्या, शिक्षकांच्या ८ हजार ५५६ रिक्त पदांच्या भरतीसाठी उमेदवारांनी दिलेला प्राधान्यक्रम विचारात घेऊन पवित्र पोर्टलवर सर्वसाधारण गुणवत्ता यादी जाहीर (General merit list announced) करण्यात आली आहे. 

पवित्र पोर्टलद्वारे राज्यातील एकूण १ हजार ८६१ व्यवस्थापनातील ८ हजार ५५६ रिक्त पदांपैकी ८ हजार २६४ पदांसाठी १२ हजार ९६६ उमेदवारांनी निवड केलेल्या प्राधान्यक्रमातील उपलब्धतेनुसार १० प्राधान्यक्रमांसाठी एकूण ७१ हजार ८०२ प्राधान्यक्रमावर शिफारस करण्यात आली आहे. मुलाखत व अध्यापन कौशल्य यांसाठी एकूण ३० गुणांची तरतूद करण्यात आली आहे. शिक्षक पदभरतीमध्ये एकवाक्यता साधण्याच्या दृष्टीने व उमेदवारांचे मूल्यमापन होण्यासाठी मानक कार्यपद्धतीचा अवलंब करण्यात येणार आहे. 

नियुक्ती प्राधिकारी म्हणून ज्या व्यवस्थापनाने पवित्र पोर्टलवर जाहिरात प्रसिद्ध केलेली होती; परंतु विविध प्रशासकीय कारणास्तव ८१ व्यवस्थापनांच्या एकूण १७७ पदे रद्द करण्यात आलेली आहेत. त्यामुळे सदर पदांसाठी उमेदवारांची मुलाखत व अध्यापन कौशल्यासाठी शिफारस होणार नसल्याचे देखील स्पष्ट करण्यात आले आहे. उशीरा का होईना पण शिक्षक भरतीची सर्वसाधारण यादी जाहीर केल्याने उमेदवारांमध्ये आनंद दिसून येत आहे.