पोषण आहाराचे ऑडिट : ऑनलाईन माहिती भरा, अन्यथा शाळांवर कारवाई.. 

एज्युवार्ता न्यूज नेटवर्क

शालेय पोषण आहारात अनेकवेळा अनियमितता असल्याच्या तक्रारी करण्यात येत असतात. त्यामुळे ही योजना शासनाने ज्या उद्देशाने सुरू केली आहे, त्या पद्धतीने सुरू आहे का? नाही याची पाहणी करण्यासाठी प्राथमिक शिक्षण संचालनालयाच्या (Directorate of Primary Education) वतीने २०२१ ते २०२४ या ३ वर्षातील पोषण आहाराचे ऑडिट (School Nutrition Audit) करण्याचा निर्णय घेण्यात आला आहे. त्यानुसार शाळांना ऑनलाईन माहिती भरण्याचे निर्देश (Instructions for filling out information online) देण्यात आले आहेत. माहिती सादर न करणाऱ्या शाळांवर दंडात्मक तसेच प्रशासकीय कारवाई करण्यात येणार असल्याचा इशारा देखील देण्यात आला आहे. 

शिक्षण संचालकांनी दिलेल्या निर्देशानुसार जिल्हास्तरावर योजनेची अंमलबजावणी करताना सन २०२१ ते २०२४ या कालावधीतील खर्चाचे लेखापरीक्षण करण्यासाठी एका संस्थेची नियुक्ती केली आहे. या संस्थेमार्फत राज्यातील सर्व जिल्ह्यातील योजनेस पात्र शाळांचे लेखापरीक्षण करण्यात येणार असल्याने योजनेस पात्र शाळांना एका वेबफॉर्मद्वारे माहिती भरावी लागणार आहे. शाळांनी माहिती भरताना शाळेकडील उपलब्ध सर्व अभिलेखांचा आधार घेऊन योग्य, अचूक व वस्तुनिष्ठ माहिती भरावी. शाळांनी माहिती भरल्यानंतर संस्थेमार्फत टप्प्याटप्प्याने विविध जिल्ह्यांचे लेखापरीक्षण करण्यात येणार असल्याचे सांगण्यात आले आहे. 

याची होणार तपासणी 

बँक पासबुक, कॅशबुकचा तपशील. तांदूळ साठा नोंदवही, इतर धान्य माल, तांदूळ खर्च विवरण नोंदवही, शासन खाती भरणा केलेल्या रकमांच्या चलनांची प्रत, खर्चाचे व्हाऊचर्स, उपयोगिता प्रमाणपत्रे, विद्यार्थी आरोग्य तपासणी विवरण आदी बाबींची तपासणी होणार आहे. तालुकानिहाय लेखापरीक्षणाचा कार्यक्रम जिल्ह्यांना कळविण्यात येणार आहे. लेखापरीक्षणासाठी सर्व शाळांनी माहिती देणे अनिवार्य आहे.