आठवड्याभरावर परीक्षा; पण वेळापत्रकाचा पत्ताच नाही, विद्यार्थी गोंधळात
आता नवीन वेळापत्रकानुसार विद्यापीठाची परीक्षा १० डिसेंबरपासून सुरु होईल. सुरवातीला पदवीची तर साधारणतः २० तारखेपासून पदव्युत्तर पदवीच्या अभ्यासक्रमांची परीक्षा सुरू होईल. मात्र, त्याचे वेळापत्रक विद्यापीठाच्या संकेतस्थळावर अपलोड झालेले नाही.
eduvarta@gmail.com 
एज्युवार्ता न्यूज नेटवर्क
पुण्यश्लोक अहिल्यादेवी होळकर सोलापूर विद्यापीठातर्फे (Punyashloka Ahilyadevi Holkar Solapur University) शैक्षणिक वर्ष २०२४-२५ मध्ये घेण्यात येणारी पहिली सत्र परीक्षा (First semester exam) यापूर्वी दोन वेळा पुढे ढकलण्यात आली. मात्र, आता नव्या वेळापत्रकानुसार विद्यापीठाची परीक्षा १० डिसेंबरपासून सुरू होत आहे. त्यानुसार काही परीक्षांचे वेळापत्रक विद्यापीठाच्या संकेतस्थळावर प्रसिद्ध करण्यात आले आहे. मात्र, पदव्युत्तर आणि पदवीच्या काही परीक्षांचे नवे वेळापत्रक (New exam schedule) संकेतस्थळावर दिसत नाही. त्यामुळे हजारो विद्यार्थ्यांना आपल्या अभ्यासक्रमाचे कोणते पेपर, कोणत्या दिवशी आहेत, याची माहिती नसल्याने गोंधळाचे वातावरण पाहायला मिळत आहे.
विधानसभा निवडणुकीची आचारसंहिता लागली आणि विद्यापीठासह संलग्नित महाविद्यालयांमधील शिक्षक-शिक्षकेतर कर्मचाऱ्यांना इलेक्शन ड्यूटी आली. त्यामुळे अनेक विद्यार्थ्यांचे परीक्षा फॉर्म विद्यापीठाला अपलोडच झाले नाहीत. त्यामुळे विद्यापीठाला परीक्षा पुढे ढकलावी लागली. आता नवीन वेळापत्रकानुसार विद्यापीठाची परीक्षा १० डिसेंबरपासून सुरु होईल. सुरवातीला पदवीची तर साधारणतः २० तारखेपासून पदव्युत्तर पदवीच्या अभ्यासक्रमांची परीक्षा सुरू होईल. मात्र, त्याचे वेळापत्रक विद्यापीठाच्या संकेतस्थळावर अपलोड झालेले नाही.
एलएलबी, एलएलएम, एम.ए, मास कम्युनिकेशन, एमबीए, बीएड, बीपीएड, एमपीएड, एमएसडब्ल्यू अशा विविध अभ्यासक्रमांचे वेळापत्रक विद्यापीठाच्या संकेतस्थळावर पाहायला मिळत आहे, पण ते ऑक्टोबर महिन्यातील आहे. परीक्षा आता आठ दिवसांवर आलेली असताना देखील विद्यापीठाच्या संकेतस्थळावर नवीन वेळापत्रक दिसत नसल्याने विद्यार्थ्यांनी नाराजी व्यक्त केली आहे.
____________________________________
दोन दिवसांत बाकी परीक्षेचे वेळापत्रक विद्यापीठाच्या संकेतस्थळावर अपलोड करण्यात येईल. पुण्यश्लोक अहिल्यादेवी होळकर सोलापूर विद्यापीठाच्या परीक्षा १० डिसेंबरपासून सुरु होत आहेत. पदवीनंतर काही दिवसांनी पदव्युत्तर पदवीच्या परीक्षा सुरु होतील. सध्या विद्यापीठाच्या संकेतस्थळावर पदवीच्या परीक्षांचे वेळापत्रक अपलोड केले असून दोन दिवसांत बाकीचेही वेळापत्रक अपलोड होईल.
श्रीकांत अंधारे, परीक्षा नियंत्रक
