नागपूर हादरले : इंजिनिअरिंगच्या विद्यार्थ्याने केली शिक्षिका आई-वडीलांची हत्या

एज्युवार्ता न्यूज नेटवर्क 

राज्यात सध्या गुन्हेगारीचा कहर माजल्याचे दिसून येत आहे. अनेक धक्कादायक घटनांमुळे राज्याच्या कायदा सुव्यवस्थेचे धिंडवडे उडाले आहेत. त्यातच आता नागपूर शहरातून हृदय (Nagpur double murder case) पिळवटून टाकणारी धक्कादायक घटना समोर आली. इंजिनिअरिंगचे शिक्षण घेणाऱ्या एका मुलाने आपल्या जन्मदात्या आई-वडीलांचे हत्या केली आहे. आई व्यवसायाने शिक्षिका होती तर वडिल थर्मल प्लांटमध्ये नोकरीला होते. घटनेची माहिती मिळताच स्थानिक पोलिसांनी (Nagpur Police) घटनास्थळ गाठून मृतदेह ताब्यात घेऊन ते शवविच्छेदनासाठी पाठवले आहेत. आरोपीने हत्या करण्यामागचे कारण सांगितल्याने नागपूर शहर हादरले आहे. 

पोलिसांनी दिलेल्या माहितीनुसार, नागपूर शहरातील कपिल नगर भागात ही घटना घडली. उत्कर्ष डाखोळे (वय २५ वर्षे) असे आरोपीचे नाव आहे. लीलाधर डाखोळे आणि अरुणा डाखोळे अशी मृतांची नावे आहेत. मृत लीलाधर हे कोराडी थर्मल प्लांटमध्ये तंत्रज्ञ म्हणून काम नोकरीला होते. तर अरुणा विनोबा भावे नगर येथील एका खाजगी शाळेत प्राथमिक शिक्षिका होत्या. आई-वडिलांच्या सततच्या बोलण्यामुळे हत्त्या केल्याची कबुली आरोपीने पोलिसांना दिली आहे. 

आरोपी  उत्कर्ष हा अभ्यासात कमी होता. तो मागली 6 वर्षांपासून अभियांत्रिकीचे शिक्षण घेत होता. वारंवार अपयश आल्याने उत्कर्षच्या पालक अभ्यास सोडून शेती करण्याचा सल्ला देत होते. पण उत्कर्ष अभियांत्रिकी पूर्ण करण्याच्या त्याच्या आग्रहावर ठाम होता. मात्र आरोपी उत्कर्षला ड्रग्सचे व्यसन होते आणि या व्यसनामुळे त्याला अभ्यास करता येत नव्हता. आई-वडिलांच्या सततच्या बोलण्यामुळे तो चिडला आणि रागाच्या भरात त्याने आपल्या जन्मदात्या आई-वडिलांची हत्या करण्याचा घातक प्लॅन तयार केला. 

1 जानेवारी रोजी सकाळी कपिल नगरमधील एका घरात दोन मृतदेह पडल्याची माहिती पोलिस नियंत्रण कक्षाला मिळाली. पोलीस घटनास्थळी पोहोचले तेव्हा त्यांना घरात दोन रक्ताने माखलेले मृतदेह आढळले. २६ डिसेंबर रोजी उत्कर्षने आधी आईचा गळा दाबून खून केला, त्यानंतर वडीलांचा वार करून खून केल्याचे पोलीस तपासात आरोपीने कबुल केल्याची माहिती पोलिसांनी दिली आहे.