राज्यभरात जिल्हास्तरीय शिक्षक क्षमता वृद्धी प्रशिक्षणास सुरुवात

एज्युवार्ता न्यूज नेटवर्क 

राज्य शैक्षणिक संशोधन व प्रशिक्षण परिषद पुणे (State Educational Research and Training Council Pune) आणि जिल्हा शिक्षण व प्रशिक्षण संस्थेच्या वतीने मुंबईसह राज्यातील जिल्हास्तरीय शिक्षक क्षमता वृद्धी प्रशिक्षण ३ ते ७ फेब्रुवारी दरम्यान आयोजित करण्यात आले आहे. प्रादेशिक विद्या प्राधिकरण मुंबई यांच्या वतीने व्यंकटेश प्रेसिडेन्सी, कामोठे, पल्लवी अविदा, रोडपाली, कळंबोली नवी मुंबई तसेच श्रीराम वेल्फेअर सोसायटी हायस्कूल अंधेरी येथे या प्रशिक्षणाचे आयोजन (Conduct training) करण्यात आले आहे.

या प्रशिक्षणात नवीन शैक्षणिक धोरण, राज्य अभ्यासक्रम आराखडा ( पायाभूत व शालेय शिक्षण स्तर), शाळा गुणवत्ता आणि आश्वासन आराखडा (SQAAF)क्षमता आधारित अध्यापन व मूल्यांकन कार्यनीती, स्तर निहाय समग्र प्रगतिपत्रक याविषयांवर प्रशिक्षणार्थी शिक्षकांना प्रात्यक्षिकांसह सखोल मार्गदर्शन करण्यात येईल. आगामी काळात राष्ट्रीय पातळीवर शिक्षणात होऊ घातलेल्या महत्वपूर्ण बदलांना कसे आत्मसात करावे याचे अभ्यासू सुलभकांकडून मार्गदर्शन मिळणार असल्याचे  प्रादेशिक विद्या प्राधिकरणच्या प्राचार्य मनिषा पवार म्हणाल्या.

उद्घाटन प्रसंगी प्राधिकरणाच्या वरिष्ठ अधिव्याख्याता संघमित्रा त्रिभुवन, समन्वयक महेशकुमार बोरसे, वैशाली काकडे, विषय साधन समन्वयक रश्मी कारंडे यांच्यासह अन्य अधिकारी विविध प्रशिक्षण केंद्रांवर उपस्थित होते. यावेळी तज्ञ सुलभक म्हणून मुंबई विभागातून जयवंत कुलकर्णी, स्वप्ना शिंदे, स्नेहा चव्हाण, कावेरी मांढरे, प्राजक्ता राजपूत, मिताली तांबे, संदीप शिंदे, कल्पेश डोंगरे, सारंगधर अंभोरे, वृषाली देसाई, प्रथमेश वाघोस्कर, मनिषा वेस्वीकर, रूपा मानकोडी, गौरी शिंदे, वैशाली म्हात्रे, डॉ. हेमाली जोशी, संतोष यादव, ज्योती वारघडे, सुजाता केळकर, काशिपुरी गोसावी यांची लोणावळा येथील राज्य स्तरीय निवड करण्यात आली होती. आता हे तज्ञ सुलभक मुंबई उत्तर, पश्चिम व दक्षिण विभागातील  शिक्षकांना जिल्हास्तरीय प्रशिक्षण  देण्याचे काम पहात आहेत. यापुढील चार दिवसात शिक्षण उपसंचालक कार्यालयांतर्गत येणाऱ्या २६६ शिक्षकांना प्रशिक्षण दिले जाणार आहे. हे प्रशिक्षणार्थी पुढील तालुका स्तरीय शिक्षक प्रशिक्षणात प्रशिक्षक म्हणून कामकाज पाहतील . दुसऱ्या टप्प्यात बृहन्मुंबई महानगरपालिकेच्या कार्यालयांतर्गत येणाऱ्या शिक्षकांचे प्रशिक्षण  पूर्ण करण्यात येईल.