वैभवी देशमुख हिच्या यशाचं अजित पवारांकडून कौतुक

एज्युवार्ता न्यूज नेटवर्क

नुकताच इयत्ता बारावीचा निकाल जाहीर झाला आहे. त्यात बीड जिल्ह्यातील मस्साजोगचे दिवंगत सरपंच संतोष देशमुख (Sarpanch Santosh Deshmukh) यांची कन्या वैभवी देशमुख (Vaibhavi Deshmukh) हीने अत्यंत कठीण, आव्हानात्मक परिस्थितीला सामोरं जात इयत्ता बारावी परीक्षेत विज्ञान शाखेतून 85.33 टक्के गूण मिळविल्याबद्दल उपमुख्यमंत्री अजित पवार (ajit pawar) यांनी तिचे अभिनंदन केले आहे.

वैभवीनं मिळविलेल्या यशानं तिच्या अंगभूत गुणांचं, हुशारीचं, धैर्याचं, संयमाचं, जबाबदारीच्या जाणीवेचं दर्शन घडल्याचं सांगून तिच्या यशानं महाराष्ट्राला आनंद झाला आहे, अशा शब्दात त्यांनी तिचं कौतुक केलं आहे.

उपमुख्यमंत्री अजित पवार यांनी वैभवी देशमुख हिला पाठविलेल्या अभिनंदनपर पत्रात तूझ्या यशातून राज्यातील इतर विद्यार्थ्यांना लढण्याची, यशस्वी होण्याची प्रेरणा मिळेल, असा विश्वास व्यक्त केला आहे. याबरोबरच तूझ्या यशानं वडील स्वर्गीय संतोष देशमुख यांना खुप आनंद झाला असता, ते आज आपल्यासोबत नसले तरी तितकाच आनंद महाराष्ट्र आज अनुभवत आहे. तुझ्या कष्टांना, जिद्दीला सलाम. यापुढेही शैक्षणिक कारकिर्दीत, जीवनाच्या प्रत्येक टप्प्यावर तूला असंच यश मिळत राहो, आम्ही सर्व कायमच तूझ्यासोबत आहोत,” असा विश्वास देत उपमुख्यमंत्री अजित पवार यांनी तिच्या पुढील वाटचालीस शुभेच्छा दिल्या आहेत.