विद्यापीठाच्या इंजिनिअरिंगच्या परीक्षेत गोंधळ ; प्रश्नपत्रिका बदलली 

एज्युवार्ता न्यूज नेटवर्क 

सावित्रीबाई फुले पुणे विद्यापीठाच्या (Savitribai Phule Pune University) परीक्षा विभागातर्फे (exam department) विविध अभ्यासक्रमाच्या परीक्षा घेतल्या जात असून शुक्रवारी अभियांत्रिकी द्वितीय वर्षाच्या (engineering second year) प्रश्नपत्रिकेमध्ये काही प्रश्नाबाबत परीक्षा केंद्रावरून हरकती घेण्यात आल्या. परिणामी परीक्षा केंद्रावर विद्यार्थ्यांमध्ये गोंधळाचे वातावरण निर्माण झाले. त्यामुळे विद्यापीठाने पहिली प्रश्नपत्रिका रद्द करून थोड्या वेळाने दुसरी प्रश्नपत्रिका पाठवली. त्यानंतर परीक्षा सुरळीतपणे पार पडली.

पुणे विद्यापीठातर्फे पुणे,अहमदनगर व नाशिक येथील संलग्न महाविद्यालयातील विद्यार्थ्यांची परीक्षा घेतली जात आहे. शुक्रवारी द्वितीय वर्ष इंजिनिअरिंगच्या विद्यार्थ्यांचा 2019 पॅटर्नचा इलेक्ट्रॉनिक्स अँड टेलिकम्युनिकेशन इंजीनियरिंग आणि कम्प्युटर इंजिनिअरिंगचा पेपर होता. विद्यापीठातर्फे सकाळी दहा ते साडेबारा या वेळेत संबंधित विषयांची परीक्षा घेतली जाणार होती. परंतु, सकाळी ९.५० वाजता परीक्षा विभागातील कार्यालयात दूरध्वनीवरून प्रश्नपत्रिकेतील काही प्रश्नाबाबत महाविद्यालय व परीक्षा केंद्रावरून हरकती उपस्थित करण्यात आल्या. त्यामुळे तांत्रिक कारणास्तव सदरची प्रश्नपत्रिका रद्द करून दुसरी प्रश्नपत्रिका थोड्याच वेळात परीक्षा केंद्रावर पाठविण्यात आली. त्याचप्रमाणे नवीन प्रश्नपत्रिका पाठविण्यात येत असल्याबाबत सर्व अभियांत्रिकी महाविद्यालयांच्या परीक्षा केंद्र, प्राचार्य व परीक्षा अधिकारी यांना विद्यापीठाच्या यंत्रणेमार्फत कळविण्यात आले. त्यामुळे या विषयांची परीक्षा सुरळीतपणे पार पडली, असे विद्यापीठातर्फे कळविण्यात आले आहे.