सर्वाधिक कॉपी बहाद्दर छत्रपती संभाजीनगर विभागात
सोमवारी भौतिकशास्त्र व तर्कशास्त्र विषयाच्या पेपरमध्ये एकूण 74 विद्यार्थ्यांना गैरप्रकार करताना पकडण्यात आले. त्यातील सर्वाधिक 57 विद्यार्थी छत्रपती संभाजीनगर विभागात आढळून आले.
eduvarta@gmail.com 
एज्युवार्ता न्यूज नेटवर्क
पुणे: महाराष्ट्र राज्य माध्यमिक व उच्च माध्यमिक शिक्षण मंडळातर्फे इयत्ता बारावीच्या परीक्षा घेतल्या जात असून या परीक्षेदरम्यान गैरप्रकारांच्या अनेक घटना समोर येत आहेत. त्यात छत्रपती संभाजीनगर विभाग पहिल्या क्रमांकावर असल्याचे दिसून येत आहे. सोमवारी भौतिकशास्त्र व तर्कशास्त्र विषयाच्या पेपरमध्ये एकूण 74 विद्यार्थ्यांना गैरप्रकार करताना पकडण्यात आले. त्यातील सर्वाधिक 57 विद्यार्थी छत्रपती संभाजीनगर विभागात आढळून आले.
राज्य मंडळातर्फे गैरमार्गाविरोधात लढा अर्थात कॉपीमुक्त अभियान राबविले जात आहे. मात्र, गैरप्रकार करणाऱ्या विद्यार्थ्यांची संख्या फारशी कमी होताना दिसत नसल्याचे आढळून आले आहे. सोमवारी 17 फेब्रुवारी रोजी भौतिकशास्त्र व तर्कशास्त्र या विषयांची परीक्षा घेण्यात आली. त्यात पुणे विभागात 7, नागपूर विभागात 1, छत्रपती संभाजी नगर विभागात 57, मुंबई विभागात 1 अमरावती विभागातील 3,नाशिक विभागात 1, लातूर विभागात 4, असे एकूण 74 विद्यार्थी गैरप्रकार करताना आढळून आले.
