निवृत्त वैद्यकीय अध्यापकांना ठोक मानधन;अभिमत विद्यापीठ कर्मचाऱ्यांना वैद्यकीय योजना लागू

एज्युवार्ता न्यूज नेटवर्क 

राज्य मंत्रिमंडळाच्या मंगळवारी पार पडलेल्या बैठकीत (State Cabinet Meetings) महायुती सरकारकडून काही महत्त्वपूर्ण निर्णय घेण्यात आले आहेत. त्यामध्ये राज्यातील शासकीय, खासगी वैद्यकीय महाविद्यालयातील निवृत्त प्राध्यापक (Retired Professor of Government, Private Medical College) यांना ठोक मानधन देणे आणि डेक्कन कॉलेज, गोखले अर्थशास्त्र व राज्यशास्त्र संस्था, टिळक महाराष्ट्र विद्यापीठातील शिक्षक व शिक्षकेत्तर कर्मचारी यांच्यासाठी लागू करण्यात आलेल्या वैद्यकीय प्रतिपूर्ती योजनेचा (Medical Reimbursement Scheme) समावेश आहे. मुख्यमंत्री एकनाथ शिंदे यांच्या नेतृत्वाखाली पार पडलेल्या या बैठकीला उपमुख्यमंत्री देवेंद्र फडणवीस आणि उपमुख्यमंत्री अजित पवार हे देखील उपस्थित होते.

शासकीय, खासगी वैद्यकीय महाविद्यालयाच्या निवृत्त अध्यापकांना ठोक मानधन देण्याचा निर्णय राज्य सरकारने घेतला आहे. जास्तीत जास्त प्रमाणात प्राध्यापक उपलब्ध व्हावेत तसेच विद्यार्थी आणि रुग्णांना त्याचा लाभ व्हावा म्हणून तसेच सेवानिवृत्त अध्यापकांना एक ठोक रकमी मानधन मिळावे, या उद्देशाने हा निर्णय घेण्यात आला आहे. प्राध्यापकांना १ लाख ८५ हजार आणि सहयोगी प्राध्यापकांना १ लाख ७० हजार तसेच दूरस्थ क्षेत्रातील महाविद्यालयांसाठी प्राध्यापकांना 2 लाख आणि सहयोगी प्राध्यापकांना १ लाख ८५ हजार मानधन देण्यात येणार असल्याचे सरकारकडून जाहीर करण्यात आले आहे. 

त्याशिवाय डेक्कन कॉलेज, गोखले संस्था, टिळक महाराष्ट्र विद्यापीठातील कर्मचाऱ्यांना वैद्यकीय प्रतिपूर्ती योजना लागू करण्याचा दुसरा महत्त्वपूर्ण निर्णय घेण्यात आला.  या तीनही संस्था शासनाच्या अधिपत्याखाली अभिमत विद्यापिठे आहेत. शासनाच्या अनुदानित महाविद्यालयांना लागू असलेली वैद्यकीय प्रतिपूर्ती योजना या अभिमत विद्यापीठांना लागू करण्याचा निर्णय घेण्यात आला आहे.