CET Cell : बीएचएमसीटी, बीबीए, बीएमएस, बीसीए, बीबीएम अभ्यासक्रम अर्जासाठी २५ मार्चपर्यंत मुदवाढ
या अभ्यासक्रमांची प्रवेश परीक्षा २८ ते ३० एप्रिल २०२६ रोजी होणार आहे. मात्र गतवर्षीच्या तुलनेत यंदा कमी अर्ज नोंदणी झाल्याने सीईटी कक्षाने या अभ्यासक्रमासाठी तिसऱ्यांदा मुदतवाढ देण्याचा निर्णय जाहीर केला आहे.
eduvarta@gmail.com 
एज्युवार्ता न्यूज नेटवर्क
'राज्य सामायिक प्रवेश परीक्षा कक्षा'मार्फत (State Common Entrance Test Cell) शैक्षणिक वर्ष २०२६-२७ (Academic year 2026-27) करिता घेण्यात येणाऱ्या बॅचलर ऑफ हॉटेल मॅनेजमेंट अँड केटरिंग टेक्नॉलॉजी, बॅचलर ऑफ बिझनेस ॲडमिनिस्ट्रेशन, बॅचलर ऑफ मॅनेजमेंट स्टडीज, बॅचलर ऑफ कॉम्प्युटर ॲप्लिकेशन, बॅचलर ऑफ मॅनेजमेंट, (BHMCT, BBA, BMS, BCA, BBM Courses) या अभ्यासक्रमांच्या प्रवेश परीक्षा नोंदणी अर्जासाठी २५ मार्चपर्यंत मुदतवाढ (Extension till March 25) देण्यात आली आहे. यापूर्वी देण्यात आलेली मुदत संपुष्टात आल्याने हा मुदतवाढीचा निर्णय घेण्यात आला आहे.
या अभ्यासक्रमांची प्रवेश परीक्षा २८ ते ३० एप्रिल २०२६ रोजी होणार आहे. मात्र गतवर्षीच्या तुलनेत यंदा कमी अर्ज नोंदणी झाल्याने सीईटी कक्षाने या अभ्यासक्रमासाठी तिसऱ्यांदा मुदतवाढ देण्याचा निर्णय जाहीर केला आहे. तसेच ज्या ज्या उमेदवारांनी अद्याप आपला 'APAAR ID' तयार केलेला नाही, त्यांनी तो DigiLocker द्वारे तयार करणे अनिवार्य आहे. परीक्षेसंबंधी सविस्तर वेळापत्रके आणि सूचनांसाठी, उमेदवारांनी 'राज्य सामायिक प्रवेश परीक्षा कक्षा'च्या अधिकृत संकेतस्थळाला नियमितपणे भेट द्यावी, असा सल्ला देण्यात आला आहे.
मागील वर्षी बी. एचएमसीटी सीईटीसाठी १ हजार ४३६ विद्यार्थ्यांनी नोंदणी केली होती. तर बीसीए /बीबीए/बीएमएस/ बीबीएम या अभ्यासक्रमांसाठी जवळपास १ लाख विद्यार्थ्यांनी नोंदणी केली होती. यंदा मात्र या अभ्यासक्रमासाठी जवळपास ६६ हजार विद्यार्थ्यांनी नोंदणी केली आहे. या अभ्यासक्रमाला मिळणाऱ्या अल्प प्रतिसादामुळे सीईटी सेलने मुदतवाढ देण्याचा निर्णय घेतला असल्याचे म्हटले आहे. या अभ्यासक्रमांसाठीची सीईटी परीक्षा महाराष्ट्रातील विविध परीक्षा केंद्रांवर संगणकाधारित पद्धतीने ऑनलाईन घेतल्या जातील.
