क्रिडा शिक्षकांसाठी मोठी बातमी; 4 हजारांपेक्षा अधिक पदे भरणार
राज्यातील जिल्हा परिषदांमध्ये शिक्षक संवर्गातील २ लाख ३६ हजार २२८ पदे पायाभूत पदे (प्राथमिक) निश्चित करण्यात आली आहेत. राज्यातील समूह साधन केंद्रांची (केंद्र शाळा) २१ ऑगस्ट २०२५ रोजीच्या शासन निर्णयानुसार पुनर्रचना करण्यात आली.
eduvarta@gmail.com 
एज्युवार्ता न्यूज नेटवर्क
अंदाजे दहा वर्षांपूर्वी स्थानिक स्वराज्य संस्थांच्या उच्च प्राथमिक शाळांमध्ये मानधन तत्त्वावर अकरा महिन्यांसाठी क्रीडा शिक्षकांच्या नेमणुका करण्यात आल्या होत्या. त्यानंतर आता राज्यातील केंद्र शाळांच्या स्तरावर क्रीडा शिक्षकांच्या पदाला शालेय शिक्षणमंत्री दादा भुसे (School Education Minister Dada Bhuse) यांच्या मार्गदर्शनाखाली शिक्षण विभागाने नुकतीच मंजुरी (Approval of the Education Department) दिली आहे. त्यामुळे ही बातमी क्रीडा शिक्षकांसाठी (Sports teacher) अत्यंत महत्त्वाची मानली जात आहे. यामुळे शाळेतील विद्यार्थ्यांची शारीरिक शिक्षणाची उपलब्धता व्यापक पातळीवर वाढेल, असा उद्देश समोर ठेवण्यात आलाय. तसेच या निर्णयामुळे शाळांमध्ये क्रीडा व शारीरिक शिक्षणावर देखील अधिकचा भर देण्यात येणार असल्याचे सागण्यात आले आहे.
हेही वाचा - क्रांतीज्योती विद्यालय मराठी चित्रपटाने केली 3.90 कोटींची कमाई
राज्यातील जिल्हा परिषदांमध्ये शिक्षक संवर्गातील २ लाख ३६ हजार २२८ पदे पायाभूत पदे (प्राथमिक) निश्चित करण्यात आली आहेत. राज्यातील समूह साधन केंद्रांची (केंद्र शाळा) २१ ऑगस्ट २०२५ रोजीच्या शासन निर्णयानुसार पुनर्रचना करण्यात आली. त्यानुसार राज्यात सद्यःस्थितीत ४ हजार ८६० समूह साधन केंद्र अस्तित्वात आहेत. १५ मार्च २०२४ च्या शासन निर्णयाद्वारे संचमान्यतेचे निकष सुधारित करण्यात आले. त्यानुसार केंद्र स्तरावर प्रत्येकी एक याप्रमाणे क्रीडा शिक्षक संवर्गातील पद मंजूर करण्यात आले. त्यामुळे केंद्रस्तरीय विशेष क्रीडा शिक्षक हा ४ हजार ८६० पदांचा समावेश असलेला संवर्ग निर्माण झाला आहे.
तर ८ ऑक्टोबर २०२४च्या शासन निर्णयानुसार केंद्रस्तरीय विशेष शिक्षक (दिव्यांग विद्यार्थी अध्यापन) संवर्गातील प्रत्येकी एक पद मंजूर करण्यात आले. त्यामुळे केंद्रस्तरीय विशेष शिक्षक (दिव्यांग विद्यार्थी अध्यापन) हा ४ हजार ८६० पदांचा समावेश असलेला संवर्ग निर्माण झाला आहे. जिल्हा परिषदेच्या आस्थापनेवर मंजूर असलेल्या पायाभूत पदांची मर्यादा कोणत्याही परिस्थितीत ओलांडता येत नाही ही वस्तुस्थिती विचारात घेऊन या मर्यादेत दोन संवर्ग निर्माण करण्यात आले आहेत, असे शासन निर्णयात नमूद करण्यात आले आहे. तसेच जिल्हानिहाय क्रीडा शिक्षकांची संख्या निश्चित करण्यात आली आहे.
नव्या योजने अंतर्गत क्रीडा शिक्षक संवर्गाची ४ हजार ८६० पदे मंजूर करण्यात आली आहेत. ही पदे जिल्हा परिषद प्राथमिक शाळांमध्ये भरली जाणार आहेत. आतापर्यंत अनेक शाळांमध्ये नियमित शारीरिक शिक्षणासाठी योग्य शिक्षण उपलब्ध नव्हता, त्यामुळे हा निर्णय ग्रामीण तसेच शहरी भागातील शाळांमध्ये सकारात्मक बदल घडवेल, अशी अपेक्षा शिक्षण तज्ज्ञांकडून व्यक्त करण्यात आली आहे.
